احنا مش هوما...

Notice: Undefined variable: relatedArticlesCount in /home1/datalyz/public_html/tounsia/plugins/content/tags.php on line 149

Nadia El Ouni - نادية العوني

احنا اللي تعلمنا ما نردوش الزهومة ..

احنا اللي نبلعو قرقوش خبز كي توحللنا شوكة في الڨرجومة ...

احنا اللي نعلقو غربالنا البرة باش نبعدو البومة...

احنا اللي نكبو سطل ما ورا المسافر باش ما يبطاش...

احنا اللي نحطو الخميرة على جبين الضيف باش يوالف ما ينسااش...

و ناكلو اربعة في صحن كان لزم ...

احنا اللي نبوسو النعمة كي تطيح من ايدينا ...

احنا اللي نرميو للشميسة سنينا ...

احنا اللي كي نطيحو المشط معناها يحكيو علينا ..

و نستاناو المطر كي ترف عينينا ...

احنا اللي نذنو في وذن الصغير اول ما يجينا ...

يطلع ولد حلال ..

و نزيدو عالعين نعلقولو خمسة و ڨرن غزال ..

احنا اللي نقمطو الصغير و نخافو نفحجو عليه لا يقعد قصير ...

كي يحصبن نغطيوه بتخليلة

و نعلقولو على صدرو فرنك كي تطلع في عينو شعيرة ...

احنا اللي ندفنو الصرة نخافو على صغارنا لا تاكلهم بلاد برا ...

احنا اللي نطهرو باغزر للعصفور ..

احنا اللي عنا طبال وقت السحور ...

احنا اللي ما نخليوش الشلايك مقلوبين ...

احنا اللي تعلمنا ما نشقوش بين ثنين ...

احنا اللي كي ياكلنا الكف نستانو شهرية ..

احنا اللي مش مليح نرجعو من شطر الثنية ..

احنا اللي نخليو حبة النبي في السبولة ...

احنا اللي كنا ... نبيتو بيبانا محلولة...

ريتو كيفاش احنا مش هوما ... اما شكونهم هوما ؟

بقلم نادية العوني

Tags: