Fatma Cherif - فاطمة الشريف

وحدة بوهالية في الفيسبوك اسمها فاطمة الشريف ... تفتي للعباد تستخايل روحها هدرة ... محضّرة رُساتات جاهزين للنسيان و المحبّة و العرس و الالتزام ... في بالها فاهمة الدنيا و فاهمة دواليبها

اليوم نحبّ نكوّر بيها ... خاطرني نكره السذاجة ... للاّ فاطمة الشريف... منين ليك انت انو الي تحب تنسى راجل تشدّ بيتها و تقعد تنوّح ... أنا ما نبكيش ... انا عمري ما نزلتلي دمعة ... انا قويّة ياسر ... حتى قدام السيّد الي الدنيا حكمت عليا بش نفارقو من غير سبب ... لليوم يعرضني ساعات ... و ساعات نتشاتي معاه ... و كل دقيقة نحلم بيه ... و عمرو ما خرج من بدني ...

Fatma Cherif - فاطمة الشريف

كي كانت أسماء صغيرة كانو يعجبوها العرايس المحطوطين في فترينة مغازة في ثنيّة المكتب ... تاقف سوايع تتفرّج عليهم و كل ما تروّح موخّرة في جرة الفرجة عالعرايس تاكل طريحة نبّاش القبور ... و ما كانتش تشعف ... و لا تبطّل الفرجة في الفترينة الي في عينيها كانت صندوق عجب ...


جرّبت ساعات تقول لأمها تشريهملها ... و لا تشريلها منهم وحدة ... أما امها كشّت عليها و ضربتها قدام صحابها متع المكتب ... أسماء ترتيبها الثالثة في وسط أربعة خوات ... مصاريفهم ما توفاش و بوها شهّار يجري على كوش الصغير و ليسي الكبير ... الفلوس لكلها للحاجات الازمين ... هكا كان يقوللها

Fatma Cherif - فاطمة الشريف

قوم من فوقي رزُنت عليا ..

قوم من فوقي رعبني منظر الدم الي يجري مع ساقيا

...

قوم باش بش نكمّل عمري؟

عمري الي مازلت كي بديتو  ومازلت كي سمعت  تزغريت امي فرحانة الي جاتها بنيّة

Fatma Cherif - فاطمة الشريف

هذا العالم لا يعجبني

لا أذكر باقي تفاصيل الحلم ... انا هكذا  دائما أنسى مشاهد احلامي وهو ما يجعلني أتوتر و أغضب وألعن ذاكرتي التي لا تصلح أن تكون ذاكرة ... ثم حين أفرغ نوبة غضبي  ألتجئ  الى الحل الأسهل الى الحلم الأسهل : حلم اليقظة أؤثثه كيفما أريد و اختار له الشخضيات التي تروق لي و الأماكن التي ارتاح لها

Fatma Cherif - فاطمة الشريف

قعدت سنين خايف لا يصير الي صار الليلة ...

أنا وياها قرينا مع بعضنا أربعة سنين نمشيو و نجيو جميع للفاك ... سكّنتها بحذايا بالذمّة ...  كي يجي بوها بش يدبّرٍلها دار تسكن فيها أوّل العام ... نقعد جمعة كاملة نوصّي فيها تشدّ صحيح مع بوها وما تسكن كان  في حومتي... هكاكا نضمنها بحذايا نعسّ عليها و نتفقّدها كي تستحق حاجة ... هكاكا نضمن اني نوصّلها في يدي كي نبدا مروّح مالقراية و هكاكا زادا نجبد عينين الي نراه يدور بسور دارها