علاه تخاف كي تقول كلمة حلوة كي تغزر لعينين أكا الفلة ..

علاه المحبة تتخبى بين البيبان و السقوطية و الخمج عادي يبان قدام العيان  ..

وقتلي ما تزرعش النوار ما عندكش الحق تتشكى و تقول مخنوق و تصلب المنطوق و تخرجو مقلوب و تضيع معنى مفقود ..

وقتلي تقول نحبك ، ركز مع لمعة العينين و شوف شنو تعمل اليدين و رد بالك تعمى و تطرش ع الفعل و الكلمة ، الي ينجمو يردوك في السماء عالي و إلا في الأرض واطي ، يهزوك و يجيبوك ، يمرمدوك و يقشتلوك و بيناتهم يفرحوك دقيقة و يشعلوا فيك لهليبة و ما توفى كان بتفريكة ..

واحد بركا بش يرى عروقك الطالعين ، يسألك في الصباح ع عينيك المنفوخين ، يضحكك في الغصرة بتفدليكتين ، يزهيلك نهارك من أولو بكلمتين و تعنيقتين ع العينين و وقتلي يغشك  فيسع يرجعلك شيطانك المتحول و يولي كلامك يتذلل ساعات بالتسوميم معبين أما الي في القلب ما ينجموش يهزوه الاثنين ..