بلاَصة فَارغة و ما فاَها كان رُوح ڨارحَة

الحَسّْ معدُومْ و كُل شي مكتُومْ

فرحَة مقتُولة و عِينين فاهُم لمعَة تعْ وحدة مهبُولة

قلبْ مهجُور و مُخْ مهدُوم

زُوز فرحَانين و هيَ برشَا منْها و كُلها مكتئبِين

كُرهْ و نفاقْ و كلاَمْ مغطسْ فِي الفضَة تعْ ذئابْ

بنَية صغِيرة موْءُودَة فِي الحفرْ و لاجَىء يستَنى فِي حفارْ القبَرْ

وعدْ باردْ و يابسْ كالحجرْ  و كلامْ ساهلْ أمَّا فِي الفعلْ يتكونساَ و يولِي ردَمْ

ضحكَة مقهُورة و أحلاَمْ مشْ معمُولَة  ..

و كِي يجِي غُدوة

تزهىَ الأيامْ و تتحلْ البِيبانْ

تضربْ فيكْ الشمسْ و تسطعْ في عبدْ و تشِيخْ ضحكْ

تركِب في كَار و يحبُو يسْرقُوك و تفيقْ و تصيحْ و يتلفُوكْ

تغزرْ لقدامْ و تعبِي صدركْ بالهوَاء و تكشخْ و تنسَى الي فاتْ

و ترمِي تلاثَة حجْراَت فِي الثْنيّة و تقُول مَا أحْلاَنِي خَاطرني تخْلقتْ بنيّة و اليِ صَار عليّ ردنيِ صبيّة و ساَعاتْ نتحَولْ لجنيّة و نرضَى بلّي بين يديّا  و دُوب ماَ تجِينِي كُرة نِلْقفْهَا و نشوُطهَا بساقيّاَ ..