نعذب فيك و إلا تعذب فيا، و الله ما نعرف هالحكاية آخرتها شنية..

حلفتلك بيمين لا يفرقنا مكتوب و لا إنس و لا جنية

و جاء نهار و كل واحد فينا شد ثنية، حاجة ممكن عادية غير أحنا كبرناها شوية..

بعد سنين، جات العين في العين، بخزرة نسيتني جرح السنين، بكلمة داويتني و بتعنيقة خذيت دوزة مورفين..دوزة ما كفاتنيش نهارين..

علاش تحير فيا و تحرك في مواجع منسية..

لا تحبني لا تصبر علي و أنا في بالي حكايتنا بالدم لي في عروقي مسقية..

ذبلت و ماتت في شطر الثنية..

ماتت و قتلت كل حاجة حلوة فيا..

ماتت و خلات وصية، ما تخلينيش نكون مرى عادية..

حتى في البعد أنا نرجسية..و حتى و إنت مع غيري نحب نكون وحدي المشتهية..

لازمني نمشي، أما قبل، خليني نعبي منك رواريا..

الدنيا تخنقني و إنت بعيد علي

كان قريتلي نهار حاجة رومنسية، أعرف راهي ليك يا نور عنيا..

و كي ماكتبش نجيب منك بنية، بالك نكونلك في الجنة حورية..