أنا زادة بنية و عندي أحلام...نحلم بالفارس اللي باش يجيني على حصان...

نحلم بعرس في نهار...لا سبعة أيام و ليالي أش قال فرحتنا لازمها تكون جهار...

نحلم بخاتم في اليد...خاتم بسيط مش بملاين في لمانها الحيل تهد...

نحب خاتم يشبهلي و يشبهلو...عليه مكتوب مالداخل أسامينا...نحبو هو زادة يلبس خاتم...

يبان في يدو القوية...كيف يحكي من بعيد نراه كينو يقول أنا ملكها هي...   نحلم نرا اللي نحبهم دايرين بيا...و أمي مالفرحة تبكي مش مشغوبة عليا...

نحلم بليلة وحدة تكون فيها الفرحة حقيقة...ملموسة...محسوسة مش كذبة و حسابات مدروسة...

نحب نعيش في دار بسيطة...و درجيحة في الجنينة ... و كيف نمرض مش بدوا نبرا ننسى مواجعي بلمسة يدو الحنينة...

نحس معاها بيد البو اللي عمري لمستها ما عرفت..و حنانة خواتي اللي بيها كبرت...

دارنا اللي على كيفنا نزينوها...تفاصيل التفاصيل مع بعضنا نختاروها...

تصاورنا اللي في كل تركينة...و أصواتنا تعلى بأغانينا...

و كلامنا اللي غيرنا ما يعرف معناه...و القلب اللي ما يدق كان و انت معاه...

و النفس اللي بلاش بيك يضياق...و النساية اللي غنى عليها لطفي بوشناق...

اللي عمرها ما تنساك... عمرها اللي باش تعيشو معاك...انت داها و هي دواك...