كيما اليوما نزاد الحب للدنيا...كيما اليوما فرحو بيه...تزغريد..بخورات...و بوه يدو في يد امو اللي مزينة بالحنة...فرحتهم باللي نزاد ما يعطيوها لحد...اللي يراه يصلي على النبي و يقول في سرو الله وحد...عينين كبار و شفرة مقلوبة...شفايف صغار بالقلم مرسومة...الحرج في الاكحل و الجلدة قمحية...امو تخزرلو و تصلي على خير البارية...ثمرة الحب جا و جاب الهنا و السعد معاه...انشالله الخير و الخيرات  في كل خطوة يخطيها وراه...

كبر الحب...عام..عامين..عشرة و اليوما خمسة و عشرين...كيف ما هو ما تبدل منو شيء...نفس البراءة و الضحكة...في المشية و الوهرة قول ولد البي...سرو في رزن كلامو اللي سابق عمرو...في قلبو الدافي و حب الكبير لبوه و امو...البنات كانت هابلت عليه...لمواقفو و الوهرة و الزين الدافي اللي خلقهم ربي فيه...ما يملى عينو لا زين و لا عرى...لا يمن لا بحب و لا بعشق و لا ريق النجوم في السماء..

الحب مات معاها كيف خلاتو...كيف مع غيرو مشات و مع اللي يدفع اكثر خانتو...و جيت من بعدها انا...اول مرة ريتو..قلت في قلبي يا سعدنا يا هنانا...قام سعدك يا قلبي و ايامك زهات...ما كانش في حسابي اللي مخبيتو الايامات....بدات الحكاية بسهرية حديث و ضحك للصباح...لين وصلنا لقلبي مسكر و من هاك العام رميت في بحور غارقة المفتاح...قتلو خلينا صحاب الصحبة دوم...قلي خايف نولي نحبك ووحدي نخلص السوم...قتلو ما تحبنيش مانيش قدو...الحب لازمو جهد وانا جهودي تهدو...الحب موش ليا وانا بعمري ما امنت بيه...بعمرو ما يرجعلك على قد ما تعطيه....مشينا في ثنية الصحبة اللي رسمناها...بيدينا كتبنا الحكاية و الحدود بخط احمو كبير مركيناها...حبنا غلطة و اللي يطيح لول باش يخلصو غالي ياسر السوم....