تربيت على يد مرا علمتني نصنع مالضعف قوة...عمري ما نسلم ولا نؤيس ولو واقفة على حافة هوة...

نكتم وجيعتي لداخل و حد ما يسمع بيا...لا نشمت فيا عدواني ولا نخلي حبيب يسخف عليا......

علمتني نقدم لقدام...نمشي على قد خطواتي لا نحسد فلان لا نقلد عيشة علان...

ارضى باللي كتب يا بنيتي هكة كانت تقول...اللي في عيشت الغير يطمع ما يربح كان تمهميش العقول...

ابني روحك بروحك...و بيديك داوي جروحك...ابكي وحدك في سكات و بسكات امسح دموعك...

كمل ثنيتك مرفوعة الراس...قول وحدي ربيت جنحاني ولا مزية للناس...

كل شي في ها الدنيا عار...اللي عاونك بقمحة غدوة يعايرك بقنطار..

.امشي و عمرك ما تتلفت وراك...لا تندم على عدو غدرك لا حبيب في نص الثنية خلاك...

ما يبكيلك كان شفرك و ما يندبلك كان ضفرك...ما دايم حد لحد...لا بو  لاولد ...لا عم ولا جد...مع كل خطوة تخطيها درس جديد...لين يكساح قلبك و تجف عينيك...

لا عاد وجيعة لا نحيب...انسى اللي مشى و خلاك...دنيا دور و مصيرو يرجع ما يلقاك...

يا بنيتي سامح خيار بني ادم قلبو صافي...خلي حسابهم عند رب العالمين وحدو هو يكافي...يخليك ليا يا أمي تاج فوق الراس...يخليك حب يغنيني عالناس