نحبك و إنت نسّاية... نحبك في حاضري  و ماضيا،  في صباحي و مسايا...

نحبك و إنت بعيدة... نحبك و إنت قريبة...

نحبك كيف بيك يكثر الهم... و كثر همّك في عوض يبكّيك يضحّك... نحبك كيف وحدك تطيح و تقوم و دباير راسك تسمع ما تستنى حد ينصحك...

نحبك و إنت قوية... نحبك و إنت على أحلامك مكويّة... تجري و تجرّي و ما تعرف راحة و لا رويّة...

نحبك خاطرك ما تشبه لحد... ساعة عاقلة لا حس تسمعلك، و ساعة  صياحك عامل مسد....

نحبك كيف تشري الشبوك و تعارك... نحبك كيف تنسى همومك و هموم غيرك تشارك...

نحبك كيف تضحك و تسكر عينيك كينك تخبي في اللحظة...

و نحبك كيف تتغشش و فيسع ترضى... نحبك و منك نخاف...

نخاف منك كيف تسكت و تجبد روحك... نخاف من كلمة لاباس في عز جرحك و نخاف كيف بيدك وحدك تغطي جروحك...

نخاف كيف ما تستحق حد معاك... و كيف تنسى كينو ماكان و تنسى اللي في قلبو حطك و دقاتو سمّاك...

أما نحبك... كلمة و أربعة حروف... و قلبي اللي عليك ملهوف...

كينو من بعدك فنات النسا... و عينيا اللي من بعدك على غيرك تتعمى...

و نحبك..