كيف يرجع قولولو استنات...جرات ورى خيالك لين حفات... تصويرتك بين طيات حوايجها خبات...و كيف قالولها تتفكر كذبت و قالت نسات...عالجمر في بعدك عفست و قداش بكات و عانات...لا فهمها لا قريب لا بعيد لا صحباتها اللي كالخوات...

حبها صدوه من ثنيتو ردوه هبال سماووه...و هي تحلف بيه و تمن...و باخلافك راجل عمرها ما حبت و عمرها ما تخمم...

و انت ؟،في بعدك عايش كالسلطان...تحوص بين الاوطان...كالطير الحر ما يحط في مكان...و خليت قلب منسي وراك كالحجر بعد ما تشيح من فيضتها الوديان...خليت وراك حب ما تنطقوش الحروف اما في العينين يبان...

كيف يرجع قولولو مشات...مشات لبعيد...لبر بارد غريب...بر ما فيهوش أخبارك و خنارك...غشك و خصامك، عشقك و غرامك...

بر تلقى فيه روحها اللي ضيعتها...واللي جرة هبالها شقّاتها تعبتها...

مشات باش تعيش لروحها و تبدا بالصحيح...باش ما يسمعها حد كيف مالوحش في عز الليل تقوم تبكي و تصيح...

مشات باش تحيي اللي مات...باش تعوض اللي فات...باش تعيش النهار بنهارو و تستطعم الليامات...

مشات باش تفسخ و تعاود من جديد...بلاصة القلب تزرع قطعة حديد...

لا تحب لا تمن بمحبة...دفنت اللي كان تحت التربّة...

مشات باش تبني في روحها و تعلي...باش تصفي حساباتها و حساب قديم ما تخلي...

مشات و عمرها ما ترجع...مشات غشيرة بقلبها تعيش ولات مرا غير صوت العقل ماعاد تسمع.