نحب نكتب الوجيعة على ورقة و نحرقها...و نحب نزرع المحبة وردة في صحرة ما تطولها  يدين تقلعها...

نحب ننطق الحروف ألحان...نحب عصا سحرية نرجع بيها الناس المتوحشة تراب بلادها بعيدة عالأوطان...

نحب الضحكة تملى الوجوه...و نحب نرجّع للناس اللي مع ليّام خسروه...

نحب نعوّض الفرحة اللي ضاعت...و نعدل الأحوال اللي مالت...

نحب نعنّق المتوحش و اللي ليلو موحش...

نحبّ نشري الصبر للّي يستنّى و المستنية طوالت...و نحب بالقطن نزرع القلوب اللي تحجرت و بالأبيض نزين القلوب اللي كحالت...

نحب برشا حاجات للناس اللي دايرين بيا...و حاجة و حويجة ليا...

نحب نحب بلحق...و نحب نكونو فرد ثنية ساقي على ساقك يدي في يدك مش أنا نمشي  و إنت تسبق...

قال شنوة راجل و إنت ديما قدامي...تحبني و بسم المحبة تعفسلي أحلامي...

نحب دنيا مزيانة...و محبة في كل بلاصة، تبسيمة ،فن و فيانة...

نحب المطر و شطحة مع غايب على غفلة حضر...

و على صوت الرعد شطحتنا...و على الطبعة كيف غشاشر بصوابعنا نرسمو ثنيتنا...

و نعيشوا هبلتنا و الناس تتفرج فينا...نحب نضحكوا لين مالضحك توجعنا جواجينا...

نمشيو لين تحفى ساقينا...نحلموا لين تفد الحلمة و تتحقق أمانينا...

نحب برشا حاجات...نحب نحيي اللي فيا مات...

نحب نرجع براءة قبل...نحب نلبس روبة بيضة و نزين شعري تاج فل...

نحب نجري كي غشيرة في الشوارع...نلوج على إحساس فيا ضايع...

ونحب نحكي لين نتعب مالكلام...و نحب نبطل نخاف من غدوة و نخزر برشا لقدام...

نحب مرة نتلفت يمكن نراك بين الأيام اللي مشات متخبي...نحب نفرغ قلبي فيك اللي منك معبي...

و نصفّيو القلوب...و نسبّوه،بعدما بعّدنا، المكتوب...

و نعيشوا حبيبات...نظفروا الشّيب مع بعضنا، و نحبك كيما البارح...محبة صادقة للممات...