أنا نعرف... نعرف شنو معناها ثنية شوك... و نعرف وجه ملك الموت... و نعرف صوت الصوت كيف يبدى مخنوق... و نعرف صوت السكات كيف كل شي فيك لداخل يموت...

نعرف البرد اللي يِمْكن العظام...و نعرف عفسِة الأيّام...

و نعرف خسارة الاحباب... و نعرف تسكيرة الأبواب...

و نعرف الدنيا كيف تغر، تعطي و بعد تفك... نعرف ضحكتها اللي مخبية في وسطها شماتة و دكّ....

نعرفها... غدرتني... فكّتلي...كيف فرحت بكّتني... و كيف قمت طيحتني.. و كيف زربت عطلتني و كيف حلمت مالحلمة فيقتني...

نعرف... نعرف مطعم الوجيعة... و الكيّ و الليعة...

و البكية بالشهقة و الطيحة من راس الجبل... و نعرف الروح كي تثلّج و تملّ...

و نعرف القلب اللي يحلف عالحب... و اللي يلعن و يسب...

في نهار حبّ فيه، في نهار هزتّو المنامة و غمّضلها عينيه...

نعرف... نعرف كيف وجه واحد في الوجوه قاعد يتعاود... و نعرف قلب بلون عين يتصاوب... و ينزف، قريب يموت أما يقاوم و يحارب...

نعرف الامل وقت اللي شي ما يبشّر بالخير...و نعرف عالجمر نسير... و نعرف نتصرف في مواجعي نسكتها في صوتها ما نحير...

و نعرف... نعرف برشا حاجات اما ما نعرفش كيفاش منك نهرب... كيفاش بغير صوتك روحي تطرب... غير العسل في عينيك ما نتبنن و نشرب...

ما نعرفش كان نهار على قوة جهدك حبيتني... و لا جهدي وحدي اللي طاح و يا غبينتي... ما نعرفش تتفكر و لا نسيتني... و كيف يقولو إسمك قدامي تجي على بالك تربيجتي...

و نعرف ،نعرف مطعم الأوهام.. و نعرف اللي الوقت ينسّي و اللي خربتّو الدنيا يصلحو الزمان..