... بعد برشا سنين عرفت اللي كيف تقرر تنسى إنسان يقرر هو يرجع...و كيف تتعب من عمايل قلبك فيك تسكتو و غير صوت العقل ما عاد تسمع...

فهمت اللي الدنيا ألوان...فيها مالبشر أنواع و للفعايل عواقب و أسوام...

عرفت اللي الحب هبال و الهبال وحلة...و حياتنا من غير عذابو ما تحلى...

عرفت اللي معظم مشاكلنا شكون سأل قبل إنت ولا أنا...وشطر حكاياتنا في عوض بالصوت نحكيوهم خبيناهم بتنهيدة و سرحة في ليل سمانا...

فهمت اللي غش أمي عليا خوف...و بلاش بيها تظلام عينيا ماعاد نشوف...

عرفت اللي الراجل بأفعالو مش باللي يحكيه...و اللي عمرو ما يقدر مهما غلات النعمة اللي في يديه...

عرفت اللي في يدك ديما مطمع للغير...و اللي مهما كبرت باش تتمنى ترجع صغير...

خالي البال...عايشها بهبال...تضحك و انت تبكي...و عينيك تدمع فرحة و انت على أحلامك اللي ترا فيها قدامك تحكي...

تعدات برشا سنين و تعلمت نكون صفحة مش سطر في كتاب...ضحكتي ما تغيب عليا و لو شفت من دنيتي و ذقت على يديها من عذابها عذاب...