اليوم العيد...عام جديد...

عام علينا مشى هزّ معاه الأحزان ...و عام آخر علينا يدخل إن شاء الله بالخير و صحّة الأبدان...

عام قديم سكّرنا عليه بڨفيلة و مقفول و ريحة كسكسي بالقديد ...و عام جديد عرّضنالو بملوخية خضراء تبشّر بالخير اللي إن شاء الله يعمّر و يزيد...

عامنا مبروك إن شاء الله على أمّتنا الإسلامية ...صباحو بدا بالبخور يفحفح ،العصيدة عالنّار تطيب و صوت الإبتهالات يعلا و الصلاة على خير البريّة...

عامنا نبداوه بمحبّة زادة...و كلمة نحبك تتقال بزيادة...

مافيها باس نزوروا الأقارب و نسألوا عالأحباب...

و مافيها باس ناخذوا بالخاطر و نرضّيو الخواطر...

عامنا جديد خلّي نبداوه بقلب صافي حليب...

اللي غلط في حقّك معاه السماح...و اللي تكسّر مصيرو و لو طال الزمان الصلاح...

عامكم مبروك