ما تحشمش من لحظات ضعفك...ما تخبيش بيدك وجهك و تمسح دمعك...

ما تحاولش تزيّن تحويقك عينيك و تفتّحها...ما تحاولش تبلع الشوكة اللي في حلقك بالعكس،إبكي صيح عيّط لين تخرجها منك تقلعها...

ما تحاولش تكذب و تزين الكلام...و إذا تخنقت من هوا و ما والمك بدّل المكان... و لا سافر من زمان لزمان...

سافر بروحك لبلاصة تتمنى تكون فيها...بلاصة صافية كي روحك تواتيك و تواتيها...

بلاصة بعيدة عالنفاق...و مافيهاش فراق...

بلاصة فيها الحب منشّر عاليمين و عالليسار...بلاصة لاك مجبور تبرر فيها فعايلك لا تحكي عالبارح و اللي صار...

ما تخبيش حقيقتك و كون إنت كيما تحب تكون...حب روحك في عينيك و أعرف قيمتك غالي ما عندك سوم...

أقرى كتاب يزهيك ولا يبكيك و لا في ميات الكتبة للقراية يشهيك...

إكتب برشا كان بالكتيبة ترتاح...و خلي دموعك في عينك تتكلّم و خلي الكلمة تتبنى النواح...

و كانك رسام...فنان و عليك الكلام...

خلّي ريشتك ترسم خطاوي تمنيت تمشيها...و بالاكحل صور لحظات من حياتك تمنيت تمحيها...

و بالأبيض أرسم الحلمة اللي تتمناها...و بالازرق أرسم سماك عالية و عينيك مرشوقة فيها...

و كانك حكواتي إحكي حكاية قوة إنت عنوانها...و خليك درس للناس بكبارها و صغارها...

خلي الناس منك تتعلم...في دروس الدنيا تلامذتك هوما و إنت المُعلم...