تجي نتقابلو بالصدفة ؟ في تصويرة كحلة .. و نلوّنوها بينا ! بغزرة بضحكة .. تجي نعملو قهوتنا بيدينا ؟ نشربوها عالكيّاس عالمادّة ، و نتربّعوا لأول مرة تربيعة العادة ..تجي نحّبك كيما نحبّني بلاش شروط ، بلاش قيود ، زوز أرواح مسيبين بلاش أسوار بيناتهم و حيوط .. نحكيو كلام ، نحكيو أفلام ، نحكيو في الحلال و الحرام و نهربو بتشعبيطة في حلمة مالأحلام .. تجي نعيشو صدفة ؟ نفصّلو التبسيمة مالضحكة ، و نفرّقوا الفرحة بغزرة و نڨطّعوا من هالدنيا و الحسرة .. تجي نسرحوا لبعيييد ، نجرّبوا المباتة تحت الشمس و الڨمرة ، في البرد و السرد ، عالحصير و التّرِب ..

نتنفسوا نسمة الليل و نعزفوا بالقصب .. تجي نعاودوا كل شيء من جديد ؟ نفسّخك و تفسّخني نهدّك و تبنيني ، نعلّيك و تكاليني .. نعيشوا بفن ، نغنيوا في الشوارع تحت الشجر و في المطر ، نلمّوا فلوس و نطيحوا نلبّوا ، نهملوا و وين تركبلنا "نشبّوا" .. نشريوا كدس محابس ، و نزرعوا ياسمينة في كل محبس  يكبروا ياسميناتنا و يوليو فرحتنا و نهديوا لكل عايلة فرحة و نزرعوا في كل دار ضحكة .. تجي نعيشو للدنيا ؟ لا للناس لا لينا ، ننساونا و ننساو العالم و امّالينا .. تجي نعيشوا لأرواحنا و نسكنوا بعضنا و لبعضنا نخطبنا .. فماش أنا و إنتي ! فما أحنا ..

لا صياغات و لا حنن و لا زازة ، طرف شقاشق و خيوط في اليد و خواتم ڨدم ، و بيت منها فيها كل شيء و ڨازة .. و نربّيوا قطوسة و نسمّيوها "فرازة" هه .. و شهر العسل نعدّيوه في الدار ، ندهنوا البيبان و الشبابك و الحيوط كل حاجة في لون ، و كان الطقس شتاء نشعلوا حطبتين و نتربعوا عالنار .. تجي ؟ نعيشوا بالليل و نشبعوا في النهار بالنوم ، مرة نقوم قبلك و مرّة على صوت غناك نقوم .. تي أي و نحبوا بعضنا 25 ساعة في اليوم ، و كان نهار تعاركنا نحكيو بالكتيبة و الموزيكا و ترضيني بمشموم .. و يتعدا الوقت يجري و تكبر منّك كرشي أما ما نجيبوش صغار لا هه نجيبو كعبورتين فن يتكعبروا ، زوز كتب كل كتاب و حكايتو ، يتفاهمو أكثر ماللي يتعارضوا .. يبنيوا دنيا غير دنيتنا ، و يعيشوا بمحبة غير محبّتنا تي شيهمنّا ..  شقولك ؟ و بيتنا كوجينتنا ! مرّة نطيب أنا و مرّة تذوّقني تلبيزة من تبلبيزك نقصد تبلبيزتنا .. و كي نفدوا نحسبوا شعراتنا و شفراتنا و نسيبوا على بعضنا هبلاتنا ، نسكروا في ضحكة و نثملو بالسرقة و الكمية موزيكتنا .. و نصلّي في محرابك و نتعبّد في أعناقك و نحسب عينيك مكّة و نحرّم الطواف بمكّتنا .. و نصوّرك هه .. و انتي راقد ، و انتي تاكل ، و انتي متغشش و فرحان و تاعب .. نصورك على غفلة و نصوّرني معاك .. كي نتلاكشو كي نتنابزو كي نتعاركوا مع بعضنا تي حتى و أحنا نحبوا في بعضنا .. بش كي نكبروا نضحكو على شبابنا .. مع بعضنا .. أيا تجي نتقابلو صدفة ؟ في ليلة كيما الليلة تحت الڨمرة ، و نجيك امخر و نطلب السماح و نخلّصها أنا القهوة .. تجي نحبّك صدفة ؟