و كي نقلّك اللي هاذي آخر مرّة بش نكتب فيها.. آخر حرف بش  يتكتب عالورقة بش يتكتب اليوم .. و آخر قطرة حبار بش تهبط مالستيلو بش تهبط توّا .. الكتيبة اللي نتنفس بيها , الحاجة اللي كيف تضيق بيا الدنيا .. اللي كيف تخونني كلماتي .. نمشيلها نجري و نترمى في حضنها نبكيلها و نشكيلها و تسمعني .. بش نخلّيها .. بش نهرب عليها و ندوّر وجهي و بعيد عليّا ننفيها .. على خاترني نجمت نعملهم الكلّ إلاّ اني نكتب عليك .. لقيت الحروف ما تهزكّش و أُسطرة كتيبة ما تنجمش تعطيك حقّك .. و إلاّ تحكي عليك .. آخر مرّة بش نحكي .. بش نفرّغ قلبي بصحّة رقعة و نقلّك خلّيني نحبّك .. خلّيني نسكنك و عليك ما تبعّدنيش ..

لا حاجتي بيك و لا حاجتي تكون حلالي .. لأوّل مرّة نحبّ نتجرّد من كوني انسان و نسكن بدنك  .. نفوت سماهم أبعاد الدنيا و ننصهرو مع بعضنا .. يولّي دمّي يمشي في عروقك و عروقك تبان على جلدي .. يولّي ليلنا نهار و نهارنا ليل .. دنيتنا لينا وحدنا مش لغيرنا .. خليّني نتنفّس هواك و نعبث بسماك .. خليّني نبكي بدموعك و نشعّل شموعك و نحكم في مشيتك و رجوعك .. خلّيني نثبّت فيك .. بالك اليوم آخر نهار نراك .. خلّيني نشبع بسماك و لعلّ بشوفتك نحيا و نعيش معاك .. نحبك تحكي و تزيد تحكي و أنا نسمع ..خلّيني نتمتّع بسنفونيّة صوتك و نحفظ لهجتك و حروفك كيفاش تخرّجها .. خليني نحبّك و نحب ضحكتك و نكتب بيها ألف حكاية .. نسرقك من روحك و فيّا نخبّيك .. خلّيني نكون هواك اللي تعيش بيه .. سرّك اللي من بلاصة لبلاصة تخبّي فيه .. خلّيني نعيش بيك و ليك ..

هاذي آخر مرّة بش نحكي فيها عليك .. خاتر قلبي تعبّى بيك و لتوّا ما جيتش .. خاتر الموت يدقّ في بابي و انتي بيّا ما حييتش .. ما عادش انجم نكتب و انا كلّ ما نجي نخمّم فيك نتوحّشك و كل ما نتوحّشك نعنّق خيالك في خيالي و نرقد .. حبّيت نجيك و نقطع بيك البرور و البحور و في قلبك نطير و نعلى للسماء ونصنع من سحاب الدنيا سرير .. نردّك سجاّدة صلاتي و من عينيك محرابي اللي ندعي منّو ربّي .. ايجا خلّيني نحكيلك قدّاش على قد بساطتك ما يتحكاش عليك .. قدّاش شاهية نحمّلك عندي و ما نسيّبكش .. نعنّقك بقلبي و برموش عينيّا نغطّيك .. نفوت بيك الارض و القاع  والسماء و السحاب .. نحب بيك و معاك الدنيا و نزيد نعشق سماها فيك .. و الكلام وحل ما حبّش يخرج و الحبار جمد .. خلّيني نسرح فيك و في عينيك و نوحل في بنّة اللّمعة في عينيك كي تسطع فيهم الشمس .. و نحسب معاك النفس ..

خلّيني نحكيلك عالفدّة اللي تمكنّي كي تغيب سيادتك .. و الغمّة اللي تتربّع على قلبي كيف نتوحّشك و ما نلقاكش .. الوقت اللي يغيب و نحس روحي بين هواء و فضاء و أنا بين يديك .. سارحة شايخة و الدنيا قدّامي جنّة بنينة فيهاش هموم .. خليني نغزرلك و منك عينيا ما نهبّطش .. نكتب بيك حكاية سنيني اللي التوّا ما كتبتها .. نرويك رواية قبل النوم لصغاري اللي مش بش يجيو و نزيد نصنعك حلمة فرحانة نهربلها كيف ما يهرب الصغير لأمّو في ليلة رعد .. خلّيني نحكيلك الحقيقة و مغير ماسكوات قدّاش شاهيتك بجنبي كي ولدي .. نتفرجو في نجومنا المزيّننة سمانا .. صوتك موجة تهزّ فيا و تجيب .. و صدرك المخدّة اللي من ريش النعام مخيّطة ..

انتي اللي كل ما نجي نحكي عليك و على حاجتي ليك نبكش .. و كل ما نجي نوصفك حروفي تهرب .. عقارب الساعة تاقف و الدنيا تضبّب و الضحكة جنازة من قلبي تخرج .. نِعكش .. و الدم في بدني يجمد .. القلب يبطّل ما عادش يدقّ .. و عروق مخّي مالوجيعة تصفّق .. و دموعي من عينيّا اطّيح تغفّق .. و الكلام اللي حاجتي بيه يوحل ما يخرجش .. نجمتش نسمّي شنوّة حكايتي معاك .. مش حبّ .. خاتر اللي يحب ينجّمش يكره و أنا في النهار اللي نراكش فيه نمقتك مش نكرهك بركا .. مش معزّة .. خاتر اللي يعزّ ينجّم ينسى و انتي ليك مدّة ساكن خيالي و أيّامي و ليلي و نهاري .. و بين دقّة القلب و الدقّة نتمنّى نراك بالسرقة و الاّ جهاري ..