تجي نتقابلو بالصدفة ؟ في تصويرة كحلة .. و نلوّنوها بينا ! بغزرة بضحكة .. تجي نعملو قهوتنا بيدينا ؟ نشربوها عالكيّاس عالمادّة ، و نتربّعوا لأول مرة تربيعة العادة ..تجي نحّبك كيما نحبّني بلاش شروط ، بلاش قيود ، زوز أرواح مسيبين بلاش أسوار بيناتهم و حيوط .. نحكيو كلام ، نحكيو أفلام ، نحكيو في الحلال و الحرام و نهربو بتشعبيطة في حلمة مالأحلام .. تجي نعيشو صدفة ؟ نفصّلو التبسيمة مالضحكة ، و نفرّقوا الفرحة بغزرة و نڨطّعوا من هالدنيا و الحسرة .. تجي نسرحوا لبعيييد ، نجرّبوا المباتة تحت الشمس و الڨمرة ، في البرد و السرد ، عالحصير و التّرِب ..

نتنفسوا نسمة الليل و نعزفوا بالقصب .. تجي نعاودوا كل شيء من جديد ؟ نفسّخك و تفسّخني نهدّك و تبنيني ، نعلّيك و تكاليني .. نعيشوا بفن ، نغنيوا في الشوارع تحت الشجر و في المطر ، نلمّوا فلوس و نطيحوا نلبّوا ، نهملوا و وين تركبلنا "نشبّوا" .. نشريوا كدس محابس ، و نزرعوا ياسمينة في كل محبس  يكبروا ياسميناتنا و يوليو فرحتنا و نهديوا لكل عايلة فرحة و نزرعوا في كل دار ضحكة .. تجي نعيشو للدنيا ؟ لا للناس لا لينا ، ننساونا و ننساو العالم و امّالينا .. تجي نعيشوا لأرواحنا و نسكنوا بعضنا و لبعضنا نخطبنا .. فماش أنا و إنتي ! فما أحنا ..

و شقولك تهبل بلا هبال ، و تعقال بلا عنوان .. و تشق الخلاء و إدّق عالشبابك في قلب الصحراء و تشوف فيهم بيبان .. ترقد في الواقع و تعيش في الخيال ، تشري منامة و تبيع حلمة مالأحلام .. حلمة في دبوزة بلاّر مسَكّْرَة ، مسَكِّرة .. اطّيشها عرض البحر و تڨعد تستنى فيها تعاود تبان ..

تصنع لروحك دورة مربّعة منها ما تخرجش ، مش ما تحبّش أما ما تنجّمش .. ادّور روحك بكدس خيوط ، تعلّي أسوار بلاش حيوط ، تلوّج على روحك فيك ، ف تراكن هاك الدورة و بين خطوط الحدود و في سكات الصوت .. تتلفّت ما تلقاش الوقت ، المناڨل تبخرّت و العقارب لسعتّك و هربت ..

نا عكسك .. نعرف كان نتوب ، بعد ما نِفسد فيك و في خيالك نجوب .. نعرف نخمّرك و نتخمّرك و بين النفس و النفس نِخزنك و فيا نخزّنك ..

حتى نا نعرف نحبّ .. أصلا نعرف كان نحبّك  و ننزل عالحروف و فيك نزيد نحبّبك ، نسطّرلك ثنايا غير الثنيّات و في حواشيها نسيّبك و ڨبل ما نلڨاك نضيّعك ، و ڨبل ما تغيب من ڨدامي خيالي يشيّعك ..

و نعرف نحبّ .. كي تطفى ، كي تشڨى ، كي تضيع فيك و روحك ما تلڨى .. نا نلڨاك ، نعبّيك نجوم ، نصوّّرك شهاب و نغمّض عيوني و نتمنّاك .. نتمنّاك ثنيّة طويلة فيهاش رجوع .. ضحكة في الظلمة تدفن الدموع ..

نتمنّاك مطرة تحلّ في الصحراء ثنايا و تعطي للسفاين الطوع .. حتّى نا نحبّ و اللي يحبّ ما ليه كان يتوب ، توبة وافية ڨبل ما تبدى .. متلحّفة بمحبّة سنين اللّة دايمة عمرها ما تفنى ..

ﻭ ﻛﻲ ﺿﺎﻕ ﺑﻴﺎ ﺍﻟﺪﻫﺮ .. ﺩﺭﺕ

ﺩﺭﺕ ﻭ ﻣﺎ ﻟﻘﻴﺘﻜﺶ ، ﻓﺮﻛﺴﺖ

ﻋﻠﻴﻚ ﻓﻴﺎ ﻭ ﻟﻮﺟﺖ ﺑﻌﻴﻨﻴﺎ ﻭ ﻣﺎ

ﺭﻳﺘﻜﺶ .. ﺳﻤﻴﺖ ﺏٱﺳﻤﻚ ﻭ

و اليوم شفت واحد يشبهلك ، أما ما يشبهلكش جملة ..  بينتاكم جبل حروف نجمش نلخصهم في كلمة .. في رقبتو شامة كيف اللي عندك اللي كنت نعيطلها أنا حمامة هه ، اللمعة في عينيه جبدتني ليك و الا ليه نتذكرش ، المفيد في خيالك حبستني ، كي صوتي كتمتني ..

هزتني حطتني من دمعي جردتني ، نفضتني ، اليوم .. تعديت قدامي ألبوم مقربط بخيوط الوحش ، حكيتهملك قبل بعينيا و انتي قتلي ما تحسش هه .. قتلي دافية و ياسر نية ، و قعدتك معايا ما تحبش .. قعدت نغزر و نثبت و نقول هو ؟ لا ! هو ؟ لا ! و قلبي رعف و طلع للسماء و ما هبطش و مكنوا الداء .. نفس الغزرة تكوي جمرة ، جهنم حمراء حرقتني خلاتني رماد و تعدات .. وقفت في قلب المدينة ، تحت القوس الخايخ وين تلاقينا .. وين ادعثرت و عليا ضحكت كي جرينا .. وين كتبنا بالفحم عالحيط هنا حبينا و تحبينا .. و هنا على بعضنا بعدنا كي تلزينا ..