هناك رأيتها تصرخ تنادي ,

تطلب أخاها و لا يأتي ,

صوت تردد صداه في السماء , يسمعه أخاها قابعا في الأرجاء ,

و لا يأتي ..

برد و شتاء , و انا في بيتي كي كدس العزاء ,, وحدي بين 4 حيوط نتخيّل في ايامات و اوقات حبيتهم يصيرو , طقس محلاه .. دنيا مضبّبة , كيّاس مبلول و عباد متلكمتة في الكبابط , اللّي ماشي يقرا و ما عينوش , واللّي قايم بكري في يدّو قهوة يستنّا في الكار , و اللّي صابح راقد بالدنيا ما علا بالوش .. انا وقتها نتخيّل , نتخيّل كان جاء المكتوب بيدينا نبدّلوه ; و على زيّ ريوسنا نقدّوه ,

رانا ماناش هنا , رانا نتمشّاو تحت المطر , تحت سحابة وحدة , يديك معنّقيني و يديّا في مكتوبك بش ادّفيني , رانا انّبرو عالبنات اللّي خدودهم و خشوماتهم حمر مالبرد , و الصغار اللّي هاربين يجريو خايفين مالرعد , رانا باعثين الدنيا و عايشين كل لحظة فيها ; نتمشّاو و عينين عالشجر اللي يرعش مالريح , و الشمس اللي من تحت السحاب بدات تزيح ,, حاطّين الكيت كعبة بكعبة , متعنكشين في بعضنا خايفين لا يفرّقونا و من بعضنا يحرمونا .. هاني نرا فيهم ! اش زايدين علينا زعما ؟