تعبت برشا قبل ما نعرف اللي ألوان الدنيا مش وردية كهو...

فيها لكحل و الأحمر و الأزرق... و قداش تعداو عليا ايامات "زرڨ"...

و عصفوا فوق راسي سحابات كحلة... و قداش مشيت عالجمر و نارو لاهبة حمرة.... و قداش كحال قلبي اللي كان أبيض...

و كل درس تعلمتو تكلفلي عبد نحبّو... كان شرط الدنيا عليا باش نتعلم لازم نخسر...

و كل خسارة هزت معاها إحساس...و كل إحساس قتل معاه إحساس آخر قبل ما يتولد...

كان إحساسي بالخوف عمرو ما مات...بالعكس كان يكبر و يتولد منو كل يوم شوية.... لين ولّى فيا انواع...

خوف مالمحبة و خوف مالصحبة و خوف مالبعد و خوف من غدوة و خوف مني و خوف عليا و خوف لا نموت قبل ما تتحقق أحلامي و خوفي مني نبقى حية..

لين تعلمت نتحدى خوفي و نراعي ظروفي...

أنا فيا مالضعف قد ما فيا قوّة... و الثنية مش ديما ياسمين، ساعات زلقات و ركزات و ساعات الطيحة تجي خفيفة و ساعات الطيحة في هوة...

تعلمت مع الأيام كيما نقسى عليا ندللني... و كيما نضيعني ،نرجع نلقاني و عالثنية ندلني...

تعلمت نقبلني و نتقبلني...و كيف نخلّيني نرجع نعنقني و نرضّيني...

المهم ما نسيبنيش... خاطر أنا بيا و ليا نعيش.