كيفاش قمت اليوم الصباح؟ قمت فرحان و زاهي...حابب روحك بزيادة و بيها لاهي؟...

غزرت لروحك في المراية و قلت محلاني اليوما؟...نستحق الفرحة،نستحق النجاح، نستحق الضحكة مرسومة على شفايفي ديما...خرجت خدمت؟ قرّيت؟ حكيت؟ ضحكت لين مالضحك بكيت....حسيت الحب؟...حب اللي دايرين بيك،حب لصحاب و لحباب و اللي خترتو ليك شريك!...

الدنيا شفتها ألوان؟ عدّيت نهارك من أول مافقت لآخر لحظة قبل ما تغمض عينيك زاهي و فرحان؟

و إنت؟ قمت فادد،قالق و مخنوق...تستنى في نهارك يوفى و للعيشة ماعادش عندك خلوق...

تستنى في نهارك يتعدى و كهو...تستنى وقتاش تروح لبيتك بين حيوطك الأربعة و تطفي الضو؟

ظلام بيتك أحسنلك مالعيشة البرّا؟ حزنك ملالك قلبك و عينيك،بلاصة للفرحة ما خلاّ؟

تقرر تخرج أما تعدي نهارك ثقيل...راسك باش يتكسر و عينيك محوقين...

تخزر للعباد و تتمنى تضحك كيفهم...تحب كيفهم و تعيش كيفهم أما ما تنجمّش؟ 

تحب تتنفس و النفس ضايع؟ تاعب،متملّح، مسلّم و كل شي بالرخيص بايع؟

مخ الهدرة اللي نهارك إنت اللي تقرر كيفاش يتعدى...ماللحظة اللي تقوم فيها،يا للفرحة ماد يدّك،يا للقلق و الفدّة...

وما فمّاش بين البينين..يا مستعد تعيشها يا تعدي حياتك تتفرج في الدنيا من غيرك تمشي و إنت يدك عالخدّين...

تفرج في غيرك عايش و إنت لا...تفرج فيه يجري ورا الفرص،شاري الدنيا بحلوها و مرها و إنت في تركينة ظلمة خايف مالبلا...