وشنية الدنيا من غير محبّة... دنيا لكلها نوّار لا كره في القلب لا في القفا مسبّة...

شنوة الدنيا بلا ضحكة و تبسيمة... بلاش ياسمينة، فل و قهيوة وأصوات صغار و جنينة...

شنوة الدنيا بلاش صاحب، صديق صدوق... لأسرارك صندوق... في غصراتك معاك و في فرحك هو لول، صاحب من تراب الجنة مخلوق...

شنوة الدنيا بلاش لمّيمة، بلاش صوتها و هي تقرى في القرآن و بلاش دورتها في دواير الدار تدور معاها روايحها البنينة...

شنوة الدنيا بلاش الوخي و الوخيّة... البنيّة في عز خوها تعيش بيّة و بيد أختها تقوى و تتحمل مشاق الثنية...

و شنوة الدنيا بلاش شريك... يتنفس هواك و يحلف بعينيك... في الخوف بجنبك كابس على يديك... يطمنك، يدفيك... يبيع الغالي و يشريك... و يدور الدنيا و عمرو ما يبطى عليك...

يرجعلك و يكمل معاك و بيك الطريق...و شنو انا بلاشك إنت... نتناساك في نصوصي و نعيش بيك في دنيتي...

آش تسوى لحظة من غيرك تتعاش... و نجمة تضوي على إسمك ما تتسماش...

آش تسوى البلايص و الوقت... آش تسوى الفرحة، من غيرك عذاب و مقت...

آش تسوى حروباتي مع الدنيا كان مش في خاطر عينيك نربحها... و آش تسوى لحظة الغروب و أنا من غيرك نشبحها...

و آش الدنيا بلاش كلمة مزيانة، لحن و غناية... الدنيا ما تسوى شي، لا مالكها ملَكْ  و لا هي تاج على راس بَيْ..