علاش نطول فيها و هي قصيرة..تي توحشتك

توحشت قباحتك و حبك ليا و كي على كلمة نحبك تطفى النار لي فيك و فيا

توحشت كلامك العسل و حتى كلامك الدوني

توحشت ريحتك، تعنيقتك و شعرك يدغدغ فيا

توحشت كي تحط يدك في يديا و تقلي تي عادي ما فيها باس كان حلمنا مع بعضنا شوية

توحشت نسرح معاك بخيالي، و في خيالي ناكلك بعينيا، نصيح، نعيط، و نقلك انت راك ليا و قبل ما تجاوبني نحلف لي لا يفرقنا لا مكتوب، لا إنس و لا جنية

توحشت بوسة الصباح و حتى بوسة العشية، تي نسالك عشرة بوسات..زوز فوق جبيني، زوز على رقبتي و الباقي بين خديا

توحشت برشا كلام ما تقالش و برشا كلام موش باش يتقال لغيرك حتى كان انت جبدت بيا

توحشت نقلك كلام السفاهة الكل و ما يهمنيش كان قلت علي موش متربية خاطر نعرف روحي أشرف من الشرف بألف و مية

توحشتك حتى في صلاتي، جاني خيالك بين عينيا، هزيت يديا و من قلبي دعيت لربي بالستر ليك و ليا

توحشتك اما زايد موش إنت لي تعرف قيمة المرى الرومنسية..

عرفت علاش أنا و إنت اليوم مش فرد ثنية؟؟