الدنيا عمرها ما كانت خايبة ..الدنيا مزيانة و فيها بارشا حاجات محلاهم ... كيف صوت بوك الصباح و .. ..تعنيقة امك و معاها دعوة من القلب .. بوسة من صغرون العيلة و ضحكة من اول جارة تعرضك في الحومة .. كي تركب في الكار و تعاون مرا كبيرة و تبقى تدعيلك و كي يغزرلك طفل قاعد انت مغصورة يقوم و يخليلك البلاصة ..

الكلمة الحلوة اللي تسمعها في الثنية من عند طفلة و الا مرا ما تعرفهاش كي تقلك "محلاك" ما غير ما تتشوحرك ، و الا اكا الصاحبة البنينة اللي كي تبدا مهنتلة و وجهك مغسول بالماء والصابون تقلك "محلاك حبوبتي" وقتلي انت وجهك يشبه لشئ،كي تدخل زادة روتار للخدمة و العرف يغزرلك و ايڨلك ادخل و ما عادش تعاودها بتبسيمة تفرهد علي الخوف  ، و كي تغيب مدة على عباد يفتقدوك و يتوحشوك ، و اول ما يراوك يترماو عليك و تبدا الضحكة البنينة اللي ما توفاش ، و البروغرامات اللي ما تتكلفش بارشا فلوس اما تعمل شبعة جوء خاتر احنا ملمومين و فرحانين و قلوبنا صافية على بعضها ...

كنت وحدي كنت إنسانة ضايعة ماشية في ثنية و ما تعرفش أخرتها وين كنت انسانة حابسة بين البينين لاهي عارفة تقدم و لاهي عارفة توخر إنسانة ما تعرفش شنية تحب حتى لين دخلت إنت لحياتي و  علمتني كيفاش نحب خليتني نعيش عيشة وردية و حطيتلي الدنيا الكل في كفوف يديا خليتني نحس لي أنا ما عشتش قبل خليتني نحس ل أنا تولدت من جديد طفلة صغيرة و كان يبعدوها على أمها تموت إي أنا كنت هكاكا ربطت حياتي بيك و كان يبعدوني عليك نموت ولا نجم نعيش بلاش بيك إنت كنت إنسان غير الناس الكل خليتني نحس لي  انا عايشة حب أفلاطوني كيما يحكيو عليه في الكتب..