يزينا ما عانينا

Notice: Undefined variable: relatedArticlesCount in /home1/datalyz/public_html/tounsia/plugins/content/tags.php on line 149

Dorsaf Chabchoubi - درصاف الشبشوبي

الحياة ماهيش ساهلة و ألوانها موش فاتحين..

ياما سوادها بات علي الجفون و تكحلت بيهم العينين.

غيومها زرڤة تعصر عالڤلب و بردها يجمد ليدين...

شمسها موش علي جنب الورقة كيف ما رسمناها ايام الصغر..

شمسها تحرق تشيح الدم من العروق..

رعدها يصم الوذنين..

ريحها هايج وبعثر احاسيسنا عالجيهتين..

موش الوقت بركة سيف ذو حدين..

حتي لفعايل تنخر كي سوس وكلام ينحر كي الموس..

تخلي الورد يذبل عالخدين...

بوس شايح من غير محبة.. القلب اكحل سواد فحم..

مغرق بالهم..

عينين شاعلة من غير نار.. دخان خارج من الوذنين..

صوابع باردين.. ملامح بالموت جامدين..

النفس خارج سكاكين.. الروح تنين.. الڤلب شامت مستحلي لوجيعة.. غزرة سم خارجة من عينين معمِين..

شفايف زرڤة حبس فيهم الدم من كثر ما بلعو كلام..

حروف بين الضلوع منسِين..

دموع شاحت من كثر ماهم محبوسين...

حروف مسمومة.. ظهور مقسومة.. وجوه سوادت..

فعايل مشومة.. خيالات ماشية في ضلام مهزومة..

خطاوي رزينة.. رجلين مكتفة.. و بالدم بلعنا السكينة..

السنين تجري و العمر هرب بينا..

واحنا حابسين في نفس التركينة... الضلام معشش فينا..

الهم كلانا من روسنا لأطرف ساقينا...

طحنا ووحدنا وقفنا وما عمرنا لحد مدينا ايدينا..

تعبنا.. بكينا.. جرينا.. و ضيعنا خطاوينا..

تهدينا.. و ريوسنا لمثڤلة سندناها بإيدينا..

تضلمنا و توجعنا و عمرنا ما نسينا....

ضحكو علينا و ڤالو الوقت يداوي..

الوقت ما يداويش.. ما ينسيش..

وما يصلحش اللي تكسر فينا..

ارحمونا و ابعدونا و ما تكملوش علينا..

يزينا ما عانينا يزي ما وجايع الڤلب خبينا..

يزي...

رانا بالهم علي صغر السن تعبينا...

درصاف الشبشوبي

Website Design Brisbane

Tags: