شمعناها !!

وجهك حزين... عينيك مكسورين...

و غزرتك ذابلة... و ملامحك غارقين...

شمعناها تعيش عشرين سنة بنفس الكوابيس و الأحلام؟؟

اك الخوف اللي مغلغل في عروش ڤلبك...

البرد اللي يسري في روحك حتي نار جهنم ما دفيه...

اك الصيحة المكتومة لداخل... تخبش.. دبش... تنبش.. تحب تخرج لبرا بأعلي صوت....

تعرف شمعناها كي تحب ترقد تحط راسك عالمخدة تحسو ثقيييل... معبي بالهم... افكار... هواجس... خيبات... تزيد تغرق في بلاصتك و يبلعك الفرش... تحل عينيك في الظلام... تتعدا قدام عينيك... وجيعتك... خيبتك... تتفكر الحيوط اللي ضربتك...

لعينين اللي نقبتك... الضوافر اللي ترشقو فيك و خبشتك...

تزيد تغرق...

تتفكر  الدنيا اللي في العزاز عليك سرقتك... أقرب الناس ليك اللي غدرتك.. إيديهم لمسخة... لسناتهم سكاكن حافية...  خباثتهم... برائتك اللي هلكتك... عينيك توساع و الظلام يزيد...

النفس يرزن.... السقف يزيد يقرب و لحيوط تضيق....

تتفكر ذنبك اللي ما عملتوش... جروحك اللي ما بروش...

تتفكر الرزين علي كتافك و ما نجمتوش....

تغرق ...

تخرج من فرشك و من حيوطك لمسكرة عليك ...

تضيع و يبلعك  الضلام...

يحبس بيك كل شي... تتحل جروحك... يفيض دمك...

تذبل عينيك... البرد الي في روحك تلحف بيك...

تبرد... تيبس... تتحنط.. دمك في عروقك يتجلط...

شريط حياتك يتعدا قدام عينيك... يجري... ما تخلطش تحبس لحظة مزيانة عشتها... خاطرك ما عشتهاش... ما حسيتهاش..

مع الدنيا ما حسبتهاش... تتفكر حاجتك اللي منك تسرقت و بمال الدنيا ما تتشراش....

تحاول تمد ايدك... باش تسرق ذكري... لحظة... حلمة...

طيييييح...

بكل قوتك تتنفض في فرشك... توساع عينيك... راسك يرزن...

تترخف... عروقك تجف... السكات كاسيك... قلبك تحطو علي يديك تبنن بيه... تهديه... تحاول جروحو تنسيه...

تدندن غناية... موش مفهومة لحكاية... اللحن حزين... دفات اليدين... تغمضت لعينين... تفرقت لحكايات... هب الريح...

برانويا.!!