يقولو في العمر هذا تبدي تبني في شخصيتك الصحيحة وتقرب لروحك اكثر و اكثر وتبدي تتعرف علي روحك بشوية بشوية وتعرف روحك شنوة تحب و شنوة تكره اش باش تخليةمن روحك لقديمة وشنوة تنحي وشنوة تزيد واش لازمك تبدل..

بديت بشوية بشوية نرا في روحي في مرا جديدة اللي بدات تتخلي علي الطفلة الصغيرة القديمة اللي كرهتها و ملت منها طفلة صغيرة ضعيفة ما تعرش شنوة تحب لا عندها طموح لا مستقبل لا شي يفرح ، طفلة صغيرة عايشة في دوامة ضعيفة الشخصية  الكل يحكم فيها كلمة تهز و كلمة تجيب ، كيفها كيف دودة القز باش تستخرج الحرير يلزم تموت الدودة  وفعلا بدات تموت اك طفلة الضعيفة المسكينة وبدات تخرج منها مرا جديدة شامخة مرا يا جبل ما يهزك ريح مرا قوية رغم كل الحب اللي في جوفها قوية بكلمتها و ضحكتها ،

قوية برايها و فكرها ،قوية بطوعها و تمردها ، قوية بعبوديتها لحريتها ،كيف طير بعد حبس اكثر من عشرين سنة يرفرف بجنحيه ويحس انوا سماء تخلقت ليه،...

بدات تتنحي اك ضبابة علي عينيها وبدات ترا في الدنيا و الناس والعالم بصورة اوضح بدات تتعرف علي روحها الجديدة .. طموحها ،احلامها ، خططها للحياة، مستقبلها ، هيوايتها، ضحكتها اللي خرجت من ڨلب ياما بكي و تحسر لبستها ، اغنيتها ، اكلتها كل حاجة جديدة فيها ..

بدات ترا في روحها المرا الحرة الانسانة اللي من حقها تعيش حياتها كيف ما تحب هي موش همّا موش كيف ما يربطوها يكتفوها ويمرمدوها يسكتوها يغموها ومن الحياة يحرموها قال شنية خايفين عليك من الخطية من العيب والحرام مالخر خايفين عليك مالحرية ....

بدات غزرتها تتبدل وترا في روحها لاهي عورة كيف ما قروها ولاهي حاجة عيب لازم تعيش بين الناس مخفية وبدات تمشي في هاك ثنية وبدات تكبر و تبني وتكبر في هاك الشخصية ..

و بدات كيف المولود الجديد يخطوا خطيوة خطيوة في حياة جديدة في دنيا تملاها تبسيمة رغم التعب ورغم الشڨاء مازالت صامدة شامخة و قوية ومازالت مواصلة في هاك الثنية لا عاد يهمها في الناس ولا اش باش يقولوا عليها بعد ما خطارت الحرية مادام تمشي مستوية موش هامها كان ضلها بان لناس اعوج وبدات تعيش و بدات تحس بوجودها وبدات رحلتها مع الحرية .