.. ..مانجمش نعيش بعيد على حيواناتي ..وفكارني وجرماناتي وقطاطسي وكلابي وطبيعتي وبحيرة الجران والبط وصوت العصافر الفجر...وهواء الغابة الي صباح يشلخط والنصب بو دينار والمارشي والجوجمة والحس والتحليق وريحة رمضان وريحة العيد وصوت الآذان..منجمش  منمشيش بحذا عمي رابح بياع الكتب ويقعد يحكيلي على الزمن الجميل ..ومنجمش منقعدش منزورش الحنينة في قبرها ونهزلها العطرشية والاكليل والماء ونقعدو نهرو ..منجمش نعيش في بلاصة مهيش متاعي ومع ناس مهمش مرحبين بوجودي ..

وقتها فهمت الي الانسان اللي تقرالوا توا يعيش في عيشة مختلفة ..ويفكر بتفكير مختلف ..ويلبس كيما يحب هو ..ويمشي وين يحب ..ويختار شكون يكلم وعلى شكون يسلم ولشكون يعمل طاولة وكراسي ..
منجمش نقعد بلا روح فيا رغم الهدات والغصرات والوجيعات باقي أنا باقي الناي تسكني ..

فهمت إلي الدنيا يستحيل تعطيني الحلمات الي حلمتهم لكل ..موش ديما الي نحلموا يتحقق ..أما باقي نحلم وباقي ندور وباقي نسقي في ورداتي الحمر وباقي نسمع في فيروز صباح وكاس الطرنجية بالقارص بجنبي ..باقي مازلت نتصارع مع الدنيا وباقي نحب نسامح روحي أكثر ..ونطور في موهبتي وباقي كي نرا الضحكة في وجه صغير متعدي في الشارع نضحك وحدي ..ومزالت نحن للزمن الجميل ونشم في ريحة الجدة وعيطتها ..وباقي رغم الوجيعة والإنكسار نحب موش حب العاشقين أبدا فهمت اللي ناي معادش نحب ..بلعكس ولين نحب روحي أكثر ونحب الدنيا وحتى وجيعتي نحبها ..

وڨتها فهمت اللي ناي منحبش نتڨلع من ديني وبلادي ..وڨتها فهمت اللي ناي ما نحبش نخرج من تونس ونعيش في بلاصة أخرى ..ما نجمش ما نشريش الحوت من فلوكتو

في الأخير نحب نقول لأي إنسان ظلمتوا الدنيا والأ قسات عليه وجرحتوا وزلعتوا ..

أقعد حاول أقعد تمرد ..أقعد ثور على العادات البالية والتقاليد الخالية ..أقعد طور من روحك ..وكسر حجرتك وهدم الصنم متاعك ..حياتنا صعيبة واليومي مقلق ..

والحرية لا تولد من العدم الحرية تولد منك أنت !

سلامي بريحة الإكليل الزعتر وريحة العطرشية وزهر الأجبال