برشا كلام يوجع ملقيتلوش حبار غير دموعي

كلام يخنق يبكي يحزن و يقطع القلب من القلب !

برشا نوم باش ننسى لكن النوم هو زاد هرب عليا ! خلاني نسهر و نتعب اكثر و اكثر !!

العقل تشوشط و التبسيمة ذبلت بدّلتها بتبسيمة بلاستيك ! بفم ماهوش فمي بحاجات فيا نسيتها ! يدي بردت و نار قلبي تشعل نسيت علاش و شنوا الي صاار !

سكاكن فيا تقطع و كلام متخبي وراء غصة .. بلاصة فارغة في قلبي. و عقلي عليها شريد و  ضايع عايشة مع خيال  الماضي نعاود في فيلم فيه ايام ضاعت فيها ايامي ! تسرقت فيها

ضحكتي و تعبست كل يوم شويا لين معادش عارفة منين نبدأ و الا وين ناقف باش نلم قشور التبسيمة ! منين نستنا كار الفرحة و الا زعمة الفرحة نساتني و تغطات بغطاء الشتاء على طول العام ؟  

نغزر لمرايتي نلقى وحدة أخرى ما عمرها كانت هي نفسها متاع البارح و غدوة نزيد نتفقد المراية و نحاول نتعايش مع هالانسانة الجديدى لكن كي نثبت نفيق بوحدة اخرى ماهياش هي نفسها متاع البارح ! توجعني روحي و نكسر المراية و تكمل توجعني يدي و توجعني المراية الي معادش فيها باش نشوف روحي الي كل يوم تتبدل