نا هي المراة الريفية ، المجاهدة المنسية ..نا هي علجية وخديجة وقمرية ..نا هي الى نسري في الفجاري للخدمة ..للكمونة نركب ولوسع ربي نقصد ..نا هي بنت تونس الي استشهدت وقتلي الكمونة حملني ، على صغاري بعدتني ولروحي فكتلي ..خلتلي ذرارية متشردين ..بعدي محرومين ومذلولين ...نا هي المراة التونسية الحرة الي تكدح وتجري باش تحقق لقمة العيش باش تعيش ..

نحنا هوما الملايكة الصغار الي خطفتنا الموت دوبا ما شمينا هواء تونس ..نحنا هوما الي تحطينا في كردونة.. وشربنا زريقة مسمومة ، وخلو عايلاتنا محرومة ...نحنا هوما الي مشفنا شيئ من الدنيا ومتنى وتدفنى تحت التراب ..جرحو امي وخلو قلبها معبي بالعذاب ...عذاب وبكاء ونواح وصياح علينا ..خاترنا تختفنا و تحرمنا وتششتنا وباعد متنا ...اما حقنا وينو !؟ وين ضاع وتنسى ..وين روحنا ؟!

شكون يقعد يسهر لاخر الليل باش تعيش انت ؟ شكون يدافع ويلقى روحو وصدروا للكرطوش باش ترقد متهنى ؟ شكون الي باعد ما تسكر باب دارك وتتهنى هو يخرج يخدم على المحافظة على بلادهم ؟ شكون الي يفدي روحو ويستشهد على خاتر حبو لبلادو ؟ شكون يبعد على عايلتوا و يبعد على صغارو باش تخرج مطمان انت ؟ شكون هو زعما

.هو بيدو الي في كل عملية ارهابية هو يستشهد خاترو يدافع على الوطن والمواطن يسهر عليهم يسهر على الحفاظ عليهم ...يسهر على حب الوطن الي يتغلل في قلوبهم .. كيف الدم الي يجري في عروق بونادم باش يعيش ...

هوما الي يفدو ارواهم واجسادهم علينا وعلى تونس لانو تونس حية وباش تبقى حية ..كيف الشمس الي تلمع في السماء باش تبقى حرة كيف حوتة الماء ...يبقى حبها مرسوغ داخلنا ..موشوم في جواجينا ...ومحفور في ذاكرتنا ...بلادنا حرة وباش تبقى حرة كيف القمحة المذهبة ...تونس البية ..تونس الغالية ...تونس الفن والتراث والتاريخ العريق ..برجالها ونساها ..بمعلميها وبمحاميها تبقى راكزة وشادة روحها ومتتهدش ...باش تبقى صامدة كيف الجبل الي ميزعزو ريح ..وحبها في القلب ميشيح ...