أنا إنسانة مغرومة ياسر بالفرجة على النجوم من صغري، نحس براحة نفسية كي نعلي راسي للسما ونرمي عينيا ونشوف النجوم تلمع في كل شبر فيك يا سما ، عاد نهار من نهارات شفت نجمة ،نجمة غريبة موش كيما أي نجمة، الحقيقة مالاول حلات في عيني لين مبعد غرقت،

وليت كل يوم نبقق في عينيا في السماء باش نراها ،نجمة بعيدة عليا بعد السما عالارض أما كل ما نهز راسي لظلام السما نشوفها، نحسها أقربلي من أي حاجة في الدنيا ، وفي زحمة النجوم نشوفها ضواية تلمع ما تطفاش ، نجمة كل ما نرمي عيني في وسط النجوم الدايرة عيني ما تطيح كان عليها ،شفت النجمة ؟ حتى أنا شفتها هالنجمة في زحمة النجوم ...

شفتها أضوى نجمة في نجوم سمايا .وحتى نهار الي طفات شوية ونقص نورها في سمايا قعدت ديما تحت عينيا ، نجمة موش كيما اي نجمة ،نجمة تحلى وتزيد تضوى أكثر كل ما تجري بيا الايام ورغملي أيامي تجري نقعد كل ليلة كل ما نرمي عيني في السما ما تحلى في عيني كان نفس النجمة ، بقربها وببعدها وبضوها الي مرة يقوى ومرة يخف ،تي حتى كي تغيب هالنجمة ونرمي عيني ما نلقاهاش في سما لياليا نقعد نستنا فيها كل ليلة لين اتطل وعمري ما نبدلها بنجمة ، شفت النجمة؟النجمة الي تجبدلك عينيك منغير ما تشعر وترشقهم فيها كل ليلة ما تسيبهاش ،نجمة عمرك ما تخيلت روحك نهار تشوفها ولا تحب وجودها في سماك وتستحلاه،

نجمة عمرك لا تخيلت روحك تلمحها في سما ولا تغيب في نهار سحاب ومطر وتحس روحك وحدك ما عندك حد وتقعد تبكي عليها وتغفص في دموعك تستنى في ها ترحمك وتعنق ضعفك منغيرها و تطل عليك لين ماعادش تنجم تفرز مابين المطر ودموعك .نجمة عزيزة تخاف في نهار تغبر وتتخبى عليك،

نجمة خلاتك اليوم تعيف بقية النجوم وتقعد تسأل في روحك زعمة نهارت الي تغيب هالنجمة كيفاش تضوي ظلمة سماك بلاش نجوم أخرين؟ كيفاش تحب نجمة أخرى ونجمتك ما فماش نجمة أخرى غيرها في سماك وهي في عينك أضوى نجمة حتى كي تغيب ؟ شفت النجمة؟؟أنا ما شفتش النجمة ، أنا عشقت النجمة وحكيت معاها ليالي، أما بعيدة ما سمعتنيش .نجمة غريبة عليها لوغتي ما فهمتنيش..