ليا سنين نخاف من فكرة الشخص الاستثنائي ،سنين لتالي قرات معايا طفلة مزيانة ورياقة وطبيعتها عسل ، عاد في نهار أحنا قاعدين في جردة ال fac ساكتين وفي قلب العقل السارح وسكاتنا نطقت وقاتلي :" تعرف...أنا عمري ما شفت روحي مزيانة، سنين لتالي أول واحد حبيتو في حياتي في لحظة غش نطر عليا وقالي .. ما فهمتش اش معجبني فيك؟ علاش ربطت روحي بوحدة كيفك ، ما فهمتش شنوا الي فيك حلو بالضبط ما فيك شي يعجب.

ورغملي بعدنا على بعضنا توا عندنا 6 سنين ، ونعرف ومقتنعة الي أنا وقتها كنت صغيرة ومراهقة وحليت عيني فيه ، بالسيف عليا بلي الناس تقلي محلاك نتفكر كلامو ومهما نحط ماكياج ونلبس لبسة مزيانة عمري لا نهار شفت روحي مزيانة ، تعرف علاش؟

على خاطر كنت نستنى كان منو هو باش يراني مزيانة وما شافنيش ، وظاهرلي عمري ما حليت في عينو ، موش أي انسان في الدنيا ينجم يكون الشخص الاستثنائي في حياتك ، أكا الانسان الي وقت تبدا انتي موش حاملة حتى شي في الدنيا بما فيهم روحك تلقاه هو فوق الناس الكل ودون الناس الكل ، تحاول le maximum توسع بالك معاه وتتحكم في غشك وما تظهرلوش الي انتي مفرعس ، أكا العبد الي تراعيلو مشاعرو، الي تمشيلو منغير ما تشعر تستنجد بيه والا تجبد معاه مجبود حديث على أي موضوع تافه باش تتفرهد أول ما تفد والا تتحط في خبابل ومشاكل ،أكا العبد الي تكون انتي موش مالناس الي تتهتم ب les petits details أما تحاول تركز مع أتفه الحاجات الي تخصو وترضيه ، عبد تكون فرحان كي يبدا هو موجود وأبسط كلمة منو تأثر فيك وأبسط موقف من ناحيتو يفرحك ويطيرك لسابع سماء ، وموش أي انسان ينجم يتدخل في حياتك ويأطر تصرفاتك ويتحكم في قلبك ،نوصيك وصاية اليوم مادامنا قاعدين مع بعضنا على موت على حياة وممكن حتى كان حيانا ربي ما نعاودوش نتقابلو مرة أخرى ، أختار ألي تنجم تأمنو على قلبك والي يكون الحارس متاعو قبل ما يكون الي ساكن  فيه ، وديما تفكر الي كلمة العيب إذا خرجت ما عادش ترجع وساعات ما تتنساش تقعد تدور وتحفر في قلبك كالموس الحافي وتعدي حياتك الكل وانتي على قد ما هالموس حافي تموت بالدبة بالدبة وتعدي الشوية وقت الي قعدلك من حياتك وانتي تنزف."