رغم الظروف الصعيبة ورغم صعوبة الدنيا وقساوتها ومرارة القدر ..وزرارق الحياة إلي متوفاش وأنيابها الحادين إلي يتغرسو منغير رحمة إلا أنو مزالت منيش مسلم ..

برشا ظروف تخليك توخر لتالي وتخليك تبكي وتشكي في همك للعالي .. تشوف في تغريبتك على روحك الي معادش فاهمها أشنوا تحب وشنوا تكره باش ترتاح وتطمئن وتدخل في السكينة ..أما باعد ما تشوف الظروف والصعوبات إلي تلزك باش تقعد تابوت محنط وفي عوض ما تقدم خطوة تولي ترجع عشرة ..

لحظة برك ياخي شبيني مزروب ؟؟ دخلت في الموضوع طول حتى السلام مسلمتش عليك ..محلى عينيك وبسمة خديك حبيت نقلك عسلامة تي وين حيك ؟ ناي راني منعرفكش أما منعرفش علاش نحبك ونحسك إنسان بالفم والملاء ..هذاكا علاش نحب ديما نكتبلك ..ناي راني لهنى معاك روحي متغبية بين ها الكلمات ..هيا خلينى نكملو عاد قتلك ! هاك تشوف زادة ومن الظروف الصعيبة إلي تخليك فادد وقالق وتاعب وحتى مكش فرحان وكان ضحكت تضحك ضحكة صفراء متاع هاني عايش والسلام واكهو ..نعرف تعبت وتوجعت وتحرقت ومعادش فيك

شوف كيفاش تونس العزيزة تتباع والخوانجية تحكم وتتجبر وتتسلط باش تشد الكراسي وتملك وتستغنى والزوالي يمشي في العفس والرغس وميخلط إلا على الفظلات متاع غرمهم وحسهم وقيلهم وقالهم ونفاقهم وكذبهم وتلغبيبهم وتقعبيطهم ماشي فيبالهم كيف يتكلموا على الزوالي ويقولوا راهو قاعد يموت بالحياة صايي جابوا الصيد من وذنو وتفكت العقدة ووفات المشكلة ..لا يا سيدي حبيت نقلك إلي الإنسان روح وبدن ..الإنسان يحتاج ويحب يعيش ..تخلق باش يعيش الحياة موش يموت فيها ..تخلق باش يلقى روحه ويثبت وجوده موش يموت في البحر وياكله الحوت ..تخلق باش يسعى ويعمر الأرض موش يموت في كميونة ويتخلط لحمه بلحلم الحيوانات ..الإنسان تخلق باش يقرأ ويحقق الرفاه ويطور من بلاده موش باش يهزه الماء في الوديان ونعملو عليه حوار وبلبلة وتوفى الحكاية ..الإنسان ميتخلصش في كلمتين تقولهم من أفامكم الناتنة بالنفاق والترهدين والتزييف والكذب ..الإنسان خلق ليحارب موش باش يموت وإنتم تتلاطخوا على الكراسي وشكون يشد الحكم ويستفرد بالرعية .علاقة الراعي بالرعية نعرف تسكنها الحب والوفاء والتعاون والمساعدة موش التجاهل والحقد والكره والكذب وتزييف الأحداث ..
و زيد تشوف في حالة الناس إلي ولات ذيوبة جيعانة تستنى فيك وقتاش تطيح باش يمشمشو لحمك ويتببنو لذتو ويحطو ملحك الي وكلتو ليهم باش تزيد البنة أكثر خاطر ولينا في غابة البقاء للأقوى والبقاء للي عندو فلوس وجاه وتتلخص تحت مقولة " الإنسان ذئب للإنسان " ..وينو إنسان الارداة والحرية والكرامة والصنعة مات ! ولى توا إنسان الاستهلاك وإنسان المظهر الخارجي والزينة والبذخ والجمال والقلب مسكون بالسوس والنقاق والكره للآخر ..
تشوف في بدنك يضعف وإنت تذوب كيف الشمعة وقاعد تتحمص بالعرق بالعرق وتتفتت بطرف بطرف كيف طابع السكر وسط كاس القهوة ..

ياخي قداش منه العبد ؟؟ سمحني قداش من الصبر ؟؟ تي لصبر حدود يا خويا ! شبيك متفهمش إلي العبد تفتت من الصبر وتعب وهو يستنى وما لقى شيئ ؟؟

شبينا ولينا هكا ؟؟ علاش ياخي نحنا في مخور ؟؟ والإ في رحبة غلم ؟؟ وإلا في غابة ..نحب نفهمك إلي عندك عقل تفكر بيه وتسعى باش تحسن الحياة من خلاله ..شبينا ولينا ناس تبع في الغرائز والشهوات ؟؟ لهادرجة ولينا حيوانات ؟ ولى الإنسان يتلخص كنشي في تلبية حاجيات الآخر الجنسية ..؟؟

حبيت نقول الحياة عبارة على مشروع مقاومة ومجاهدة ومشروع باش تصنع روحك بالحجرة بالحجرة لين تعمل دار ! الإنسان لاهو جنس ومتعة الفراش ومهوش قداش يملك هناشر وفلوس ومهوش إنسان البس والسراول المقطعة واللينات المذخمة والكرفات والكنوليا الغالية ..

الإنسان روح وبدن ..الإنسان ضحكة مزيانة وقوة تتلخص في طريقة وحسن إستغلاله لعقله ..

لكلنا تعرضنا لضعف ومشاغل ومشاكل وحقرة من الآخر وحتى ولينا أبطال قصص خرافية منعرفو عليها شيئ ! صحيح الحياة صعيبة وناسها أصعب أما موش باش نسلموا ونرضو بالقدر ونسكتو على أوجاعنا .. اللغة تحررك من ماضيك وتصنع منك إنسان يتكلم وتصنع منك إنسان يحاور ويعبر ويقول ويفضح وينشر ويفرض رأيه ويسكر الصنم إلي ركبه لروحه ويحرر روحه من حجرة الصمت .. معنتها كسر طوق الصمت ..
نعيشو جميع ونحترمو بعضنا مذاما عندنا عقل نخممو بيه خاكر حبينا والا كرهنا الارض وكن للجميع ! .. ميسالش نقبلو المختلف علينا سواء كان في الشكل والا في اللغة والا في الدين والا في اللباس والا اي حكاية تلقاها

مختلفة عليك خاكر الاختلافات هي فروقات ولودة مبدعة .. ونتحرروا من فكرة الآخارون هم الجحيم باش نأسسوا لفكرة إن المختلف هو المباين والمماثل للأنا ..

معنتها إنت عيش على كيفك أصنع جوك أعرف شكون تكلم ولشكون تعمل طاولة وكراسي وشكون تحقر وعلى شكون تنبر وشكون تكره ! وعادي سامح خاطر نأكدلك مهما شديت البغض باش تقعد متفكرها الحكاية في مخك ..حاول تسامح خاطر السماح يرتحك ويفرهد وتحس بالفخر بروحك خاطرك انسان مسامح ومسالم ومتحب تضر حد .. عيش كيما تحب انت مةش كيما يحبو هوما ألبس وتكلم وامشي واشري الي تحب عليه انت مولى روحك وانت روح موش الاخر الي يفكلك في سعادتك .. كان قلقاتك الدنيا عادي اشطح معاها وطيح وتمرمد وتمرغد في دومتها وباعد قوم وانفض حوايجك من الغبرة وعاود قوم ..ومستحيل حط في بالك الي حلمكاتك الكل باش تتحقق الكل ! ..
في الاخير نحب نقلك مهما قسات عليك الدنيا وجعاتك وزلعاتك ومرمداتك ودمتماتك وخنقاتك ..تمرد وتحرر وأصنع من روحك إنسان آخر ..مهما غصراتك صعوبات الحياة حاول تتحرك وحاول كل مرة تقدم خطوة ميسالش نعرف صعيب أنا بيدي يعلم العالي قدانيش موجوع وقداش الدنيا فاكتلي حاجات محلاها ..اما مزالت شاد صحيح خاطر نعرف في كل انسان في اعماقو وداخلو بير وماجن مخبي فيه مخزون متاع صبر ..

أقعد حاول راهو مزال فيه الجهد ومزال النفس داخل خارج ومزال الدام يجري في العروق والدنيا مزالت موفاتش !!! ...