اليوم كبيرنا ولا هو الصغير يتوجع و يبكي و يلاغي !

توكلو بيدك و تتربج بيه ! تطيعو و تكذب ساعات عليه ! ترضيه ببوسة على الجبين و تقلو ''على خاطري مكانش معاش نجي ''  تكش ساعات عليه في مصحتو و انت من الداخل مش راضي لكن ما يلزك على المر كان إلي أمر منو !

صغيرة الدنيا لبارح هاك الانسان إلي على الفرش مريض كان يصول و يجول كان بسلطتو فرحان  لا شيء يتعدى عليه  لا معناها لا و اليوم الماكينات تحكم فيه ! البارح كان هاك العبد الكلمة كلمتو و الشورة شورتو ! توّا،  مرهون في كلمة من طبيبو لا عاد يشاوروه و لا عاد فما كلمة ! الكلمة تقولها الايام و ااتعب مع الوالدين طاعة ماعمرو كان تعب !

لكن إلي يوجع هو السيناريوات إلي تتعدى قدام عينيك تخص هاك الانسان ! تتفكر مواقفك معاه و الباهي و الا الخايب الي كان بيناتكم ! ساعات توجعك عمايلهم لكن في قرارة نفسك مسامحهم خاطر الوقت هو الي يكشف معدن الانسان !

و الضغينة عمرها ما تخلي الانسان طيب و في قلبو الرحمة ، ما يحيينا كان ربي و ما ينقصلنا في العمر كان هو سبحانو .. عيشو أما ما تنساوش الخير لازم يكون مزروع في قلوبكم و يديكم ! مازالت البركة في الدنيا