حكولي على الدنيا: قالولي عليها الي هي فانية..نوارة متفتحة باينة مزروعة وسط قلوبنا هانية بروحها وبترابها متفتحة كالسانية ...بحركتها وبتفاصيلها وصعوباتها ترقص علينا كالجارية ...جارية ترقص وهازى  بندير وتدويرة حزامها تميل وتتميل في  سنين تعب ودمار ودموع العين وبرشا خنار..

خبروني على تراكنها المتخبية بالفرح المسموم معبية ...رسمولي سمايل الدنيا ونحتوهالي في حلة غشيرة صغيرة ؛ ضريفة ..طبيعتها عفيفة اما خزرتها خبيثة...يقتر من وجها سم وحكايات عنيفة ..خبروني على برشا اسرار متركنة وروايات مفبركة...برشا اسئلة تجول في خاطري وتدور في مخي نحوم ونحوس

ياخي  علاش الدنيا مقردة علينا ...علاش كي تضحكلنا تضرنا وكي تحزن كل شيئ يتسكر ؟ ...هو صحيح عندنا عقل باش نجمو نتألقموا مع طلعاتها الي ساعات تعلينا لسابع سماء وتتفحلنا نوارة الخير وفي بعض ساعات تتمرد علينا وتثور كيفها كيف

البركان الي يحرق ..الي يخرج في جمرات حمر تذوق المر...

...ساعات نقول  مخيبها ها الدنيا كلها مشاكل وصعوبات وضغوطات ...معبية كان بالخبابل ..ومشربكة من كل النواحي ...تهز ساق تخرق لخرى ...فيها كان الخايب والعايب والباهي مهوش موجود  تي يرحم ربي ...ها الدنيا فيها كان الامراض والدموع والبكاء والنكد..والزهر المفقود..فيها كان الوصف متاع  "البقاء للاقوى " ...فيها كان قالي وقتلك وهذاكا وهذيكا..وولد فولان  وبنت فلتان ...فيها كان الكلام الباهي الي ينغل بالخايب ..فيها الفرحة معجونة بالحرقة ..فيها عيون في الشمس داخلها قرون تعب وطمس  ..فيها

كلمة نحب  ننسى .ونتحرر ونتجرد من كل شيئ حابس حركتي وضحكتي وشيختي ... نحب نتحرر منهم   نحب نتحرر من روحي والناس الي دايرة بيا ... ننسى الذكريات ..ننسى الماضي ...والمستقبل... نحب نعيش حر ... كالحوت وسط البحر ... كالعصفور طاير في البر ...نحب نجنح ونطير ونعاند الحمام في حريتو ...ونعاند الحوت في جمالو ونعاند النحلة في كدها وعملها .  نحب ننسى نحب نشم هواء نظيف  .نحب نصبح على صوت فيروزي وعلى قهيوة  فنجان عربي وضحكة وبوسة مرصوصة من امي..نحب نخرج نقرى كتاب ...نحب نسافر ونخرج ونحتج ...يزيني مامشيت بهواهم المسخ ..يزيني ما قاومت جهلهم وهوما يسلطو عليا في الاوامر الي تحبسني وتجسني داخل اخلالهم ..يزي تعبت من التعب ...ذقت المر لين استحليت مطعموا وادمنت عليه ... ...يزيني خترني فديت من عيشة العبد لاراء المجتمع الي نسير عليها ..يزيني خاترني : خلقت لاعيش وخلقت لاحارب ...خلقت فقط  لاجاهد واحلم واحقق واستمتع ...خلقت لاقول انى  ديني لنفسي ودين الناس للناس ...خلقت فقط  لاحي الحياة..واقول حي على الحياة فانا مقبل عليها رغم  الصعوبات مقبل عليها رغم العثرات واحب فيها كل شيى حتى الثغرات ...فانا كما وصفنا الشابي  "خلقت طليقا كطيف النسيم وحرا كنور الضحى في سماه" تغرد كالطير اين اندفعت وتشدو لمن شاء وحي الالاه"