البدن تعب والمخ تحرڨ ..
العيون ذبلت والفرح منها تسرڨ ..
العروڨ بانت والوجه شحاب ..
السواد الي داير بيا والخيالات والسراب ..
الصبر والصبر تي مليت من التجراب ..
مليت من كذب الناس وحب الاحباب ..
مليت من بكاء السماء ومن رعد الدنيا والسحاب ..

الڨلب توجع وتكسر وراااب..
تهتك وتدمر وتهد وطاب ..
الزهر مع الدنيا تبخر ..
والبدن فيه تحجر ووخر ..
والراس كلاه ناار الشيت وهجم ..
ڨتلى الحزن والشوڨ والهم ..
ڨالولي اتبسم لدنيا واضحك وانسى الغم ..
انسى لدغات الدنيا وانسى لسانها الي يڨطر بالسم ..
اعمل محفل وطبال وزكرة وارخى ودم ..
خلي السنون تبان والضحكة متفارڨ الفم ..
ڨتلهم : التجراب منه عيت
والصبر تكربست فيه وفديت ..
والوجيعة تبننت مرها ورويت ..
وتمنيت ملك الموت يطل ويڨلي هاني جيت ..
الاصحاب ذوڨوني الدفلة لين تشويت..
ذوڨوني الجرح ودغرت الخدمي لين تعميت ..
الحياة والزهر خليتهم ومشيت ..
اييييييييه يا دنيا ..
ڨداش فيك ناس تبكي وتشكى ..
ڨداش فيك من عبد تحت الشمس يشڨى ..
ڨداش فيك من زوالي للملاكة يشهى ..لڨمة العيش يلڨى..وللبطن يملى ..
ڨداش فيك من ظالم يطغى ..و ڨداش فيك من ناس لفلوس لحلال تسعى ..
ڨداش فيك من حوت ياكل الحوت وڨليل الجهد يموت ..
ڨداش فيك الرخص والبخص ..وناس للحرام تهز وتڨرطس ..
يا رب الدنيا لصلاح اهدي ..
وللخير ادي ..
خفف علينا ما نزل وخلي الصبر في الڨلب يتسجن ..