كذبوا علينا و قالوا للحب عيد...نهار تفرح فيه اللي تحبو تخليه زاهي و سعيد...

تهديلو...و على كبر حبك ليه تحكيلو...

تكتبلو كان لزم قصيدة...و تقلو قداش حياتك قبلو موحشة...فارغة... و روحك في الهموم كانت تتخبط وحيدة...

ويوفى النهار و يصبح نهار جديد...و يقوموا الناس كالعادة و يوفى العيد...

و ترجع التكشبيرة...و الغش...و المشاكل و الغيرة...

مش البارح كان الحب في كل تركينة!...و الفرحة كانت في نفس العينين اللي ترا فيها اليوم حزينة...

كذبوا علينا...علمونا اللي الحب نهار في العام...و عملوا المشاعر أسوام...

على قد الهدية تكون المحبة...و اللي مكبر عقلو و ما يهديش ما يحبكش و لقاها سبة...

قبل ما تعلمونا نعملوا للحب عيد علمونا معناه...علمونا اللي قيمتو في عين المحبوب تترا مش في خاتم شراه...

علمونا اللي الحب متاع كل يوم...و اللي الحب أنواع و أصدقها هو اللي يدوم...

علمونا اللي كلمة نحبك ما تحشمش ما تخوفش...نقولها لامي اللي حبها ما يموتش... لاختي و لخويا اللي نهار من غيرهم ما يفوتش...

نقولها لصاحبتي و عشيري اللي نلقاهم في الغصرات... و أستاذي اللي شجعني مرة ولولاه ماوصلت في العلم لاعلى الدرجات...

علمونا اللي الحب مش هو ولا هي بالذات...و قبل ما تتبنى المحبة على الظواهر تتبنى عالباطن و الصفات...

علمونا اللي الحب مش كلام أفعال...اللي صدق المشاعر ما يتشراش بالمال...