فليس مع فليس يوليو كديس....اش علينا في اللي لاباس بيه و اللي يفيس...

احنا باش نمشيو في الدنيا خطيوة خطيوة...باش نبداو من الصفر لين من كدس حطب نبديو دويرة....

بعيدة عالمدينة و الجوجمة و الحس...دافية و دفاها من فم الباب يتحس...

باش ناثوها على كيفنا...و نعديو فيها شتانا و صيفنا....

باش نسافرو زادة و نفضلو فلوس بزيادة...باش نكتشفو و نعيشو الهبال على قاعدة... باش نتشعبطو في جبولات و نجريو في صعدة...

باش نعيشوها كيما تخيلناها...كيما حلمنا بيها و تمنيناها...باش نعملو وشمة على يدينا بحروف اسامينا...باش تفكرنا كل ما جا اش ينسينا...

باش نشريو برشا كتب...و نتفرجو افلام رعب...ضحك و حب...

باش نعملو في الجنينة درجيحة...باش نكون اول وحدة نهنيك بدنيتنا الجديدة و باش تكون اليد اللي تقومني مع اول طيحة...

باش تحبني و تموت عليا و تقول اشعار في شعري و لون عينيا...

و باش نحبك و نفنى فيك و نعشق الوطى اللي عليها طبعت خطاوي ساقيك...

باش نعيشو دنيتنا على كيفنا مش على كيفهم...باش نحيو عقدتهم و نمحيو من بيناتنا طيفهم...