Notice: Undefined variable: relatedArticlesCount in /home1/datalyz/public_html/tounsia/plugins/content/tags.php on line 149

عيدكم مبروك

bkhour-aidSihem Hannachi - سهام الحناشي

عيدنا عيدين...فيه فرحة الصغار و فرحة الحاج اللي واقف بين يدين رب العالمين...

عيد اللمة... تزهى فيه النفوس و تنزاح الغمة...

تكثر فيه العينة...اللي يذبح..اللي يشوي و اللميمة في الكوجينة..

يتلم الشمل و العيلة...تفوح الروايح بين المشوى و البخورات في كل دار و كل تركينة...

عيد صعيب علي خسر و فارق...و علي معبي من كاس الاحزان و ذايق..

عيد صعيب علي خسرت كبدتها شهيد...واللي معدي عيدو بعيد على اهلو وحيد...

اللي يخدم على الخبزة المرة...والزوالي اللي متمني يفرح صغيراتو مرة...

اللي متغرب و مسافر...واللي من هاك العام من غير رجوع بلادو هاجر...

عيد مبروك للزوالي المنسي المتروك....و للحنينة اللي على الباب تستنى في وليدها قبل العيد بليلة...

واللي اول عيد من غير حبيبو يعديه...واللي في قلبو متمني في عرفة تتحقق أمانيه...واللي العيد يحير عليه مواجعو و يبكيه...

عيدكم فرحة لقلوبكم و رجوع لضحكتكم...

عيدكم عيد طفل صغير بعلوشو فارح...و بنوتة تستنى باش تعاون ميمتها مالبارح...

عيدكم مبروك

سهام الحناشي
عيدكم مبروك