تعرف روحك كبرت مع اول شهرية تاخوها...و كيف اللي تحبها تمشي تخطبها من بوها... والبنوتة تكبر كيف في ليلة ڨمرتها ضواية تتصدر...و امها على فراقها تبكي و تتكدر..

تعرف روحك كبرت كيف تمشي ثنية موش مفهومة لوين...اما مجبور تمشيها و لو حبو على الساقين... كيف ماعادش عندك طريق رجوع...و تعفس على قلبك و تتناسا ولو موجوع ... كيف الاصحاب تنقص على قبل...وكيف تعيش بعقلية مش عايش على امل...كيف تتوحش تحط راسك في حجر لميمة و ترمي همومك الكل...و تتوحش قعيدة في جنينة داركم القديمة وقهيوة و ريحة الفل..

تعرف روحك كبرت بعد برشا كفوف...و تبرد على الدنيا و على عيشتها معادش ملهوف...

تعرف روحك كبرت كيف تعرف قلبك في صدرك تسكتو وقت اللي تكثر دوتو...و عقلك على كيفك تسيرو...

تعرف روحك كبرت كيف يولي وجود برشا في حياتك كيف بيهم كيف بلاش...وكيف تغزر لفعالهم بسكات لا لوم لا علاش و كيفاش...

تعرف روحك كبرت كيف تلقى روحك و تتعرف عليها...كيف بين نجوم السما تفرز نجمتك و  تعدي لياليك تناجيها...