19 سبتمبر 2019

ليتها تكون الليلة الآخير التي أغمض فيها عيني وينتهي كل شيء وأترك لكم الحياة

ديما ها الدعاء مسجون في اعماق مخي ! حتى اذا كنت في عز فرحتي نحب نرتاح ..ونحب نهرب ونحب نتجرد من الجسد متاعي ..موش ديما ندعي لحقيقة خاتر حبيت والا كرهت مليت من الطلبة ومليت من عدم الاجابة وليت ياسر مقصر مع ربي ليا مدة ..صحيح نسمع القرءان ونسبح ليه هو ونصلي على النبي ومئمن بيه ..اما حاجة وحيدة فيا لداخل تقولي كان جاء يحبك راهو رتحك من ها الدنيا !

ياخي جربتوه اكا الشعور انك معادش تنجم تتحمل حتى شي ..لا تتنفس ولا تنجم تمشي ..تحسك عاجز ومكبل ومحنط في بلاصة برك ..نفس الحكايات تتعاود ..نفس الوجوه الي كل يوم ..نفس الخرافة والحكاية..اما لحكاية الي نحكي عليها حكاية معبيا بالحشو والزايد ومعبيا بالاحداث لين ولات متشبه لشي ..بلحق معادش نجم نكمل ! ونواصل ..تعبت وتهتكت! وتهرست ! ..تحرمت من فرحتي وضحكتي ..منيش ضعيف كيما قلت انت ! بلعكس انا اقوى من اذاكا خاتر واجهت وقاومت وتكسرت وتدمرت وتعذبت وتذبحت ومتت وتشليت وحييت وعبيت وواسيت وطلبت ما لقيت لين ولات حكاية زايدة ..كل يوم في حرب ..وكل يوم تتدغرني ها الدنيا بسيف ماضي ..نخرج من الدار وانا نقول بيني وبين روحي ياخي لوقتاش على ها الحال ؟ لوقتاش باش تفرج ! صبرت صبرت لين فديت من الصبر ! تي لصبر حدود ..

الي متنجمتش تفهمو الي الانسان الي تقرالو انت توا تعب من المواجهة ..بلحق تعبت من التمثيل ! ..وتعبت من لبسان ماسك متاع انسان شاد روحو ومزال فيه الجهد انو يكمل ..مزال مكبش بالايدين والساقين في الدنيا ! ..باش تقول هذا ضعيف نفسيا وشخصيتو هشة ! باش تقول ضعيف ومهوش مكبش في ربي والايمان بيه ! باش تقولي برى سبح لربي وصلي ركعتين توا تتفرهد ! باش تقولي الي الدنيا مرة الفوق ومرة لوطة ! حلو ومر حتى يتعدى لعمر ! والكف الي ميقتلكشي يقويك ! ..المشكل يا صديقي الي انا عملتهم الكل ! العالم متاعكم وعداتكم وتقاليدكم وعقلياتكم منجمتهاش ! نحسها تكذب ! نحسها جيفة ولازمها تتفوح بالكونوليا ! ..انا لا نجمت سياستكم ومنجمتش نصدق رئيس حكوكتكم ..ولا رئيس برلمانكم ..منجمتش نتنفس هواكم المسخ !..

منيش متشائم ومنيش حزين ..والا كلمتكم الشهيرة الكئيب الي ينشر في الكأبة والحزن في كل بلاصة ..المنكد والاسود ومر القهرة الي بلا سكر ..وبرد شتاء جانفي ..وهيجان الطبيعة ..وكسر الخاطر ..وفراق الميمة ..والجرح الي محبش يبرى ..انا كلهم انا ..انا هاذم لكل ..شنيا ذنبي انا كي منجمش نعيش معاكم ..شنيا ذنبي انا كي نبكي كل ليلة وحدي منغير لا يسمعني حد ..شنيا ذنبي انا كي منجمش نمشي لامي ونحملها ونبوسها ونقعد نبكي لين نشبع ! ..شنيا ذنبي انا كي تخلقت نظيف ومنشبهش ليكم ! ..

اما ذنبي يظهر كي منجرجش باش نكلمكم ..نولي معقد وخايف منكم ..نولي المنكد والبري الي ميحبش يقابل الناس ..والا مسكين مريض ..ياخي المريض والمعقد عندكم الي حدو وحد روحو ..الي ميتكيفش وميسكرش معنتها موش راجل ..ياخي الرجولية عندكم كي تضرب مرتك وتجيب الصغار منها وباعد طلقها وكل واحد يمشي على روحو ..ياخي الرجولية عندكم كي تتطلب من امك حق دخانك وقهوتك باش تمشي تعمل طريح تقطيع وترييش في الخلق !؟ ..والا الانوثة عندكم معنتها نهود وافخاذ وصدر وشفايف وبوتوكس ومكياج وشعر وجنس واغراء وعراء في البحر وسهرية لوجوه الصباح ..! ياخي عندكم انتم المصلي معنتها سلفي ومتشدد ! والا ميضهر مصلي كان باللحية والقميص والسبحة وريحة المسك تعقعق ! .. وبرشا حكايات اخرين !!! تخليك عاجز انك تواصل وتقدم ! ومنيش باش نقلك صلح روحك وطورها خلينى نعيشو مع بعضنا اما باش نقلك ادعي باش ربي يهز الامانة متاعو خير خاترني بلحق عييييييييت من دنيتكم ..