توا وين فهمت وتيقنت الي الدنيا الي نجري على خاطرها يستحيل تعطيني الحاجة الي نحلم بيها ..

قداش من حلمة ضحينا على خاطرها ومشات في مهب الريح ؟ قداش من عشقة عشقناها وفي لخر تطلع حكايتها فارغة وبو دورو ..قداش من بكية بكيناها على ناس خايبة في حياتنا ..ناس غالطة وغلطناها وجودهم كي عدمهم في حياتنا ..انا نعرف الجار للجار رحمة موش نقمة وبغض ..ونعرف الصديق لصديق نعمة موش حسد وكراهية ونعرف زادة ما الحب الا للحبيب الاول ولخرين كلهم حكايات فارغة ...

الڨلب الي وجعك على الحاجة الي فاتت باش يقعد ديما واجعك وين تتفكرها .. ودمعة الندم الي هبطط من عنيك باش تقعد ديما تعذب فيك خاطر عطيت للقضية اكبر من حجمها الطبيعي ..

قداش من واحد دخل لحياتنا وبلبزها ؟ وقداش من مرة نعطو فرصة وفرصة وفرصة اخرى لين القلب يفد من الفرص ؟ سمحوني ياخي حاسين بيا !؟ جربتوش حبيتو عبد من عروش ڨلوبكم وعطيتوه ثيقتكم وعشقتوه وعلى خاطرو ضحيتو وعملتو الي ميتعملش وحتى كرامتكم تنحات في جرتو وهو ولى مرة حس بيكم وبمشاعركم ! قمة النذالة والحقارة كي واحد يحبك ويهديك ويحاول يفرهدلك على خاطرك وانت متعبروش ومتحسبوش في حتى شي تعملو ... على خاطرو تخسر صحتك وحياتك وقرايتك ومستقبلك وحبك لامك وللدنيا وفي لخر تطلع غلطط فيه وكانك تحب في ڨالب ثلج بارد.. وفي بدن بلا روح ..وفي قبر منسي ..وفي حياة بالية كئيبة ..تحب كانك في شيئ هامد لا يتحرك لا يبادلك نفس الشعور والاحساس ! ..علاش تعملو معانا هكا !؟ ..ياخي هذا كفونا نحنا الي نعانو ونجاهدو ونحاولو معاكم للخر ؟ علاش كمية السذاجة الي فيكم ! قتلوتو كل شي جميل فينا ! ..

فيبالك انا منضحك الما تضحك انت ..ومنحط لقمة في فمي الما تاكل انت ..ومنرقد انا الما نتهنى عليك انت .. ومنتحمس للحاجة كان كي نحكي معاك ونتهنى عليك .. فيبالك ماهو مزاجي مرتبط بيك انت ؟ مرتبط بتفاعلك معاي ..مرتبط بكلامك بتصرفاتك معاي ! ...

قدانيش نسخف نعرف وقدانيش رابط سعادتي باشخاص معندهم ميزيدوني في حياتي كان الشر والعفن الي كيفهم نعرف والشي هذا هاني قاعد نشوف فيه ونلمس فيه بعد الي وليت بحرابشي من طبيب نفساني لطبيب نفساني وباعد الي وليت كيف الشمعة نذوب نهار بعد النهار وناري لاهبة... علاش هذا الكل؟؟؟ على خاطر واحد ميبادلنيش نفس الاحساس ..على خاطر انا عبارة على الشمس وهو المطر ..على خاطر انا الحنين والطيب وهو طاحب القلب القاسي ..على خاطرني انا الحب وهو الحجر والصرد ..

حياتنا عدم الي نحبوه ميحبناش .. والي منحبوهش يحبنا ! ..مفارقة واضحة ..عقدة بلا حل ومفيهاش حتى حل ..خاطر هكا هي الدنيا تقوم على المفارقات ...

اما بلاهي والي قلبو كي قلبي !؟ صافي وافي مع الدنيا ..حنين وياخذ بالخاطر ..عندو كلمتو ويكون في الموعد وميكذبش وميعرفش شنوا معنتها نفاق...وميكذبش وميزيفش الحقائق ..انسان باتم معنى الكلمة ..شنوا الي عملو باش ياخذ هذا الكل من الدنيا !؟ ياخي غلط في حاجة !؟ علاش الدنيا متظلم كان الي كيفي ومتعفس كان الي قلبو طيب مع الناس !!؟

علاش تجي ليا انا وتوقف !؟ وتحبس تتبلج وتسكت .. علاش الدنيا تحطلي في العباد الي عكسي في طريقي !؟ ..علاش نحب كان الي مهوش كيفي .. شبيني نتعلق كان بالاشخاص الي قلوبهم كاسحين وباردين ولامبالين وميحسوش وميعرفوش شنوما معنتها حب وتضحية !؟ شعملت في عمري ياخي انا !؟ بالك غلطط في حاجة بالك ظلمت حد ..بالك عذبت حد ؟ بالك تمنيكت على حد ..تي العباد هي الي تتمنيك عليا وانا الي نسكت والعباد هي الي تظلم فيا وانا الي نطبس راسي ونحيهم لربي ..

اما بيناتنا انا تعبت من الانتظار وتعبت كوني انسان بطريقة اذيكا ..وتعبت من الحب الي من  طرف واحد ..  كانو الطرف لاخر ميحسش .. مهوش حاسس بيك جملة .. تتحرق واحد ..تموت في النهار الاف المرات  وحدك ..تتليع وحدك ..تغير عليه وحدك وهو ميحسش بشي .. ميشعرش تجاهك بشي كان بالاخوة او بالصداقة ..قلبو يجي قدامك انت وميوليش يضرب ..سوايعو مهيش معدلة على الحب .. قال شنوا صغر ودين ومستقبل ودنيا هاذم الكل يرفضو علاقة الحب ...

ياخي كي واحد يقلكم نحبك متخسرو عليه كان كلمة الله غالب منجمتش نحبك ؟ او تسكتو او تقولو كلمتكم الشهيرة المستقبل قدامك اكيد حياتك مهيش باش توقف على خاطري انا ...باهي نعرفو الكلام هذا واحساسي انا وشعوري وناري اللاهبة وقلبي الي يمعس ..وعنيا الي تدمع  وروحي الي تندب فيهم حيار ..سمحوني بلاهي علاش دنيتنا هكا ..

علاش نحب نفهم علاش متراعوش ضروف الاخر ..علاش متضحوش مع الي ضحى معاكم !؟  علاش متحبوش الي حبكم ولو تحاولو معاه ومتسكروش بخاطرو .. علاش متقبلوش بيه ..وتطبطبو على صدرو ..
قداش من مرة نحاول فيها نقرب وفي داخلي يحب يحتظنك وانت لا حس لا خبر ...

علاش كمية البرود هذي ياخي هذا جزاء الانسان الي يحب من ڨلبو ...

وشبيه الحب جاء لداري وتبدل لونو ولى بالدم الاحمر ..شبيه النوار خرج شوكو وغرس انيابو فيا انا ..علاش الدنيا كشرت على سنونها وطعنطني بيهم في ظلوعي ..شبي الشمس محرقتني كان انا .. وشبي المطر مبلتني كان انا وعلاش الرعد مرعد تحت راسي انا !؟ ..

علاش الوجيعة مسكنت وعششت كان في ڨلبي انا !؟ ياخي انا شعملت هذا جزاء الي يحب عندكم ! شبيه الحب الصادق الي خارج من الجوجي متحسوش بيه والحب البارد الي مفيه ميتشاف الي مرمد تحسوه وتتطعموه ؟

علاش هذا الكل ؟! ياخي علاش الاصحاب وقت الخسرة متلقهمش والحبيب وقت البكية يفر ويخليك .. علاش الدنيا متعذب كان الي قلبو طيب وعلاش الحبيب ميحب كان الحب المرمد الي مفيهش روح ...

علاش نحبو الي ميحبناش ومنحبوش الي يحبنا .. وعلاش الماضي بذكرياتو يتبع فينا رغم حاولنا ننساوه ..وعلاش الصاحب متلقاه ماد وجهو كان وقت المصلحة !؟ علاش كلامكم سام !؟ علاش متراعوش الي الانسان الحساس الي قلبو رهيف ويعيش وسطكم بيناتكم ..علاش تنسو فيسع العبد الي كلى عمرو على خاطركم وتتذكرو كان اصحاب الباردين الي كيفكم ...
علاش نحنا الفيئة هذي الي ينطبق عليهم المعذبون في الارض ويظهرلي جينا من كوكب اخر غير الكوكب هذا ..

عالمكم مهوش عالمنا ودنيتكم مهيش دنيتنا وناسكم مهمش ناسنا وخاصة قلوبكم مهمش كيما قلوبنا ...
اما شنوا الحل ..!؟

يتبع