حسيتش مرة تحب ترجع للصغرة تعيط وتلعب وتنڨز وتلعب السالسا والتناڨو والكاري والغميظة !؟؟

حنيتش مرة تحط راسك على المخدة وترقد من غير متخمم في شيئ !؟

شكونو أول حب في حياتك ؟ وهل أنو بريت من وجيعت فراقو !؟

أصحاب الصغرة مزالو معاك والا بدلوك بأصحاب جدد؟؟

مزالت تخاف من بوشكارة ومن أم الذراري والغول الي كانو يخوفوك بيهم وقت الصغرة  ؟

مزالت ترعش وقت تسمع صوت الرعد وتخاف وقت يبرق البرق ويظهرو عروق في السماء وتقول هذوكم عروق ربي !؟؟!؟

توحشت حنيت جداك وريحتها  وأحضانها ودفاها وزينها ...
مزالت تتفكر وجها والوشم الي في ايديها ...

هل كيف ماتت حسيت بيها والا وجيعت موتها توا حسيتها !؟

علاش المهبول ديما فرحان وشايخ ؟؟؟

وعلاش الي عندو عقل ديما سعيد !؟!؟

علاش المرأة السمراء تسموها زرڨة وكحلوشة ومهيش مزيانة ويا تكون بيضة يا لا وتمشي  تدفن روحها خير  !؟!

علاش المختلف تحسسوه الي هو مختلف وتتمنيكو عليه !؟

وعلاش الي يعاود في القراية تحسسوه الي هو خاسر ومهوش قراي ...والي وصلو هوما المتعلمين والمثقفين والي يفهمو في كل شيئ!؟؟

مزال قلبك يوجعك كيف تتفكر شكون ضلمك !؟ وتعدى عليك وعنفك وسبك وحطمك وخلى دمعتك تغسل في وجهك  وعطى على ساڨيه !؟؟!


شكون فيكم حس بالخيانة والغدر من أقرب إنسان ليه !؟!

حسيتش مرة هنت وقيمتك طاحت وكرامتك سقطط منك  !؟

وقتاش آخر مرة بكيت !؟!

عمركش قريت كتاب ومتحبوش يكمل وكيف كمل حسيت بالنقص وبالفراغ ...

عمركش بكيت وسط الناس المليانة ودموعك على خديك وحد ممسحلك دمعتك !؟؟

أخي ثما  ناس في حياتك كيف وجودهم  كيف عدمهم !؟ موجودين بلا فايدة !؟!! معبين البلاصة ...
قلوبهم أكسح وأبرد من حجر السكة !؟؟

أناهو أحسن أستاذ قراك وخلى فيك أثر مزيان ؟؟؟

عمركش تخمرت على طريح مزود وهل أنو لحمك يقشعر كيف تسمع الحضرة  و العيساوية والتيجانية !؟!؟

عندك في الدنيا هذي عبد وقت تكبس عليك الدنيا تمشيلو وتترمى في أحضانو !؟؟

عمركش سألت شكونو ربي !؟! ووقتاش يوم القيامة وشكونو أبو لهب وإمرأته حمالة الحطب ...شكونو أبو هريرة !؟. وهل هو بلحق بو القطوسة ؛؟! وشكون عثمان بن عفان !؟؟

وبلحق في الجاهلية ماتو على خاطر معشوقاتهم وبلحق دافنتشي الجوكاندا الي صورها هي صورة لمرأة حبها !؟!

وشكونو حنى السكران الي غنات عليه فيروز !؟!

وشنوا معنتها إنسان يبحث عن الوجود وعن الذات !؟؟

عمركش حبيت ترى  زين محمد عليه الصلاة والسلام ؟؟

عمركش قوتك طاحت وتلاشت وضعفت ...


عمركش حلمت حلمة يستحيل تتحقق  وفي لخر تحققت وفرحت  !؟؟

عمركش تعرظت للظلم وبكيت وتكسرت عظامك ومڨلت لحد  في العالم هذا !؟؟

علاش كيف تصلي ترتاح وكيف تركع تحس روحك فوق بساااط سحري  !؟؟

وعلاش تقول الكلام الزايد وتتكيف وتسب ربي باش تثبت الي انت راجل !؟!؟

وعلاش كيف تطيح بيك متلقى حد !؟!

شبيك تحب تحكي اما تقعد ساكت وعلاش تحب تشطح على المزود اما تحشم ..وشبيك متقولش المخبي في قلبك ..وعلاش ديما تسال علي ميسألش عليك ..

وعلاش نحشمو  كي نقولو لوالدينا الي نحنا نحبوهم !؟!

وعلاش يشدك الضحك وقت تحكي امور جدية !؟!؟

وعلاش كل شيئ نعرفوه وقت نموتو !؟!

وشبي الحب لونو هكا !؟!

عمركش تعرضت لحملة من التنمر من قبل العباد !؟؟

علاش مفهمك حد ..وشبي الي يمشي لطبيب نفساني تسموه مهبول ومعقد ومريض !؟؟

وهو علاش مرض !؟! من شكون !؟؟

وعلاش منعاونوش بعضنا ...

عمركش كذبت على روحك !؟!!

وندمت على حاجة في دنيا ..!؟

وعلاش ساعات تلقى ناس أشر منهم متراش عينيك وناس كيف الملاك ميضرو حد تحطهم على الجراح يبرد   !؟؟

وشبي قلبك يوجعك باعد كل طيحة !؟!

علاش تخاف من  عقدة بدنك....

شبيك تحب تتحرر وتعري وتوري اما تحشم وتخاف !؟!


علاش الي عامل الوشام وعامل جو مع روحو تسموه شاذ وميصلحش ومهوش منتمي للدين ...

وشكون قاللكم إنتم منتمين للدين !؟؟

وعلاش الحب تخافو منه !؟!؟

شبيه إلي يغلط لازمو قبل ميتحاسب عند ربي تحاسبوه انتم !؟؟؟ بكلامكم وبعداتكم وبتقاليدكم وثقافتكم ..إنتم ربي !؟؟ إو تحطو رواحكم في مرتبة الإلاه !؟!؟.


علاش كل من تفلسف تمنطق وكل من تمنطق تزندق..!؟!؟

عمركش سألت شكونو أبو نواس !؟ وشكونو البحتري وشكون إبن زيدون وشكونو كفاكا ..وعلاش فان جوغ إنتحر !؟! وعلاش الرسامة الاسبانية قصت ساقها !؟! وشبيه أبو القاسم الشابي مات في عمر صغير !؟!؟ وشكونو كهلان والمسيحية والرهبان وشكونو البابا ..و

العكبة من داخل شنوا فيها !؟!

وشبي آلبرت كامو في رواية الغريب يحكي بالطريقة هذيكا !؟!!؟

وعلاش نقولو إلي يكتب بالدارجة معنتها مهوش مثقف ومعندوش كريزمة ونسبوه ونعايروه ونخلوه يعاني !؟!؟

علاش تنقد في الكتابات الي بالدارجة و المسعدي يقول "الأدب مأساة أو لا يكون "

وشبيك نحشم وقت يقولك واحد نحبك !؟؟ وعلاش تخاف من نهار غدوة !؟!  



...سالتش روحك شنوا تحب تعمل والحاجات الي معملتهمش
شنيا الخدمة الي تحب تخدمها ومخدمتهاش والماكلة البنينة الي تحب تاكلها ومكليتهاش والحلمة الفولانية ومحلمتهاش ...

سالتش روحك قداش من مرة حسيت روحك وحدك وانت بين الناس
شنوا تعنيلك الحرية !؟!وهل انو لحمك يقشعر كي تسمع السولامية !؟؟
احكيلي على حبك لول احكيلي عليه على زين عينيه وحموريت شفتو وبياضة سنيه ..لمعت خديه ..وروعة بدنو وحنيت جواجيه
احكيلي على العبد الي حبيتو ومحبكش ؟؟
وعلاش الدنيا خذاتلك كل حاجة جميلة وهزتهم لجبانة !؟؟
وهل انو بلحق الميت يحس بيك وقت تجيه !؟؟؟
...


حسام حفيظ