في كل مرة نحس فيها بروح مخنوق نهرب نجري نغم على روحي ونرقد موش حب النوم بقدر ماهو هرب من افكاري الي تشوش في عقلي و تعذب فيه نهار بعد نهار..تحرق فيا انا من داخل وتشعل النار وتدفي روحها ..في كل مرة تخدرني ها الدنيا نحط الكيت ونغوس مع الغناية ..

نحاول انطير اكثر واكثر اما منجمش خاتر جوانحي صغار منجمش نطير اكثر من لازم ..نلقى عيناي تعطف وتشفق عليا تدمع وحدها ومتبعة الثنية ..نلقى روحي نبكي ونعاود نبكي ..نحس بقلبي واجعني ...نحس بروحي فاد والا الدنيا فادى مني منعرش الحاجة الوحيدة الي نعرفها ..الدنيا مشاية ضدي ...

في كل نهار نحاول نهرب من عقلي نمشي ونبعد عليه قد مايلزم ..نضحك ونلعب ونفرح وناسي روحي المجروحة ..ناسي الي انا معنف و محروق بنار الدنيا.. نشرب في مرها كل يوم ويذوق في سمها بالايامات..ننسى كل شيئ وانظهر لامي الي قلبي مزال فارغ ومخي مزال مصعصع فارغ كيما تقول هي ..نمثل عليها ومنحسسهاش الي الدنيا ممرمدتني ومعنفتني ..منقوللهاش الي ناسها حقرتني وذلتني ..حزدتني على ضحكة المزيفة وعلى روحي الطافية ...

منحاولش نظهر لامي الي انا كبرت وندمت ...منخبرهاش باش يحس قلبي وقداهش معبي ...نقول بيني وبين نفسي خليني هكا ..خليني مخبي جروحي وكتمهم داخل روحي ..خليني نتعذب ونتحطم كل يوم ..خليها تقول الي ولدها بغيل خاترو ديما رقدا..وتقول زادة ولدها فارح وشايخ مخو صغير ومزال بكري عليه ...خليني نمثل الي انا فرحان ومنيش جيعان تعبان ...خليني نمثل الي انا قوي وروحي اقوى مني ..خليني نمثل الي انا منتهدش ونقاوم ونتنفس ...خليني هكا ممثل كذاب مكوي بنار الدنيا العذاب...نموت كل يوم في جرت الاسباب ..متحمل العقاب وهزو فوق كتافي الارهاق والاتعاب .

.لكن اتعاب الدنيا هذي بعد الي هدتني وقتلتني وذلتني قدمتلي هدية وهي اني نتغير من جديد ونبني وسطي انسان حديد ..انسان نعيش بروح طاهرة ..نظيف من كل الخطايى المتعددة صافية ..بحنية القلب دافية ..مكسورة الخاطر لكنها عافية ..نغزر لدنيا وصعوباتها بعين متألمة ..متفائلة شايفة .. كي الغشيرة الصغير تجري وسط الدار حافية لا من الدنيا ولا من ناسها الذيوبة ولا من سم كلامهم خايفة ..تتأقلم مع الحياة وتتلون وتتزين كالقصيد بالقافية ..

وفي الاخير نحب نقول : اسعى للمحاولة ..في كل الاحوال ليس لدى خيار غير ان اسلك طريق المحاولة وعدم المكوث في مكان سقوطي ..كلما ضعفت استنجدت بالله. كلما اشتدت وقست عليا هذه الدنيا بصعوباتها احاول جاهد ان اخرج من مشاكلها ..احاول واحاول رغم السقوط فانا في النهاية خلقت لاحاول ولاعيش ..وشرف الانسان في المحاولة.