Notice: Undefined variable: relatedArticlesCount in /home1/datalyz/public_html/tounsia/plugins/content/tags.php on line 149
تونسكم عمرها ما كانت لينا
Ines Hammami - إيناس هماميامي كانت ديما تقلي الحب ما يوكلش خبز ما يبنيش حياة و ميضمنش مستقبل اما انا كان ما يعنينيش
اعطيني نتنفس هواك نتسحر بترابك و نشق فطري على نجمة من سماك انا بيك انت نعيش ..
كبرت و انا كل يوم نزيد نتعلق بيك نرضاها فيا و لا فيك مش قتلك الروح ترخسلك و كان استحقيتها بيها نفديك
اما مش يقولوا الحب يعمي العينين و انا توا كبرت و كايني بديت نرى مليح هاك طلعت ما تحبنيش..
يا تونس قلي علاه ما تحبنيش.
علاش كي نجيك محتاج ما تعاونيش علاه كي نجيك خايف تطيشني و ما تحظنيش
و كي نجيك مريض ترميني ماتداوينيش زعما خاطر زاوالي و ما في حاليش
مش عندي الحق فيك علاش مالا ما تاوينيش تي كنت نسخايل روحي بيك غني
ياخي عملت معاك الدوني و لا ريت مني الخايب و لا بالك ضريتك و عمتلك مصايب
علاه ديما تحب تخبيني تردمني و ما تظهرنيش
علاش و لايتي منسية لا مدرسة لا سبيطار لا جامعة لا كلية
لا ماء لا ضوء و لا حتى جرد كياس يسهل الثنية لا تنمية لا تشغيل لا مركز أمن لا عدالة جهوية
علاه تاخو منا و تعطيهم علاه تبكي عنا و كي تفرح تجريلهم
علاش تشرب من دمنا و عرقنا و تعبنا و تمشي ترويهم بالك ماناش تبعينك..
بالك ما نملاوش عينك .. بالك ثقلنا موازينك . و ماذبيك منا تتبرا
يا تونس .. رد بالك تنسى..
احنا اللي صناك ..هوما برخص باعوك و احنا شريناك
هوما اللي غرقتهم بخيراتك و هجروك و احنا اللي همشتنا و عمرنا ما نسيناك
هوما استغلوك سرقوك و احنا اللي حميناك هوما خربوك ولوحوك و احنا عاودنا بنيناك
احنا الي باولادنا و اخواتنا فديناك
احنا اللي نخرجو جنازة الشهيد القلب يبكي و الفم يزغرط كاينو عيد و عمرنا ما لمناك
احنا اللي بدموماتنا سقيناك غطينا عين شمس بالغربال و ثورة الياسمين سميناك
احنا الي خدمناك احنا اللي خظراء رديناك
بكبيرنا بصغيرنا بقمحنا بشعيرنا بزيتنا و زيتونا بجبالنا و سهولنا
احنا اللي سقيناك عسلنا و شهدنا على خاطرك شقينا و تمرمدنا
زرعنا فيك ورودنا و كي تفتحوا فكوهم و طردونا
اذاكا علاه احنا خليناك و في البحر مع ارواحنا رميناك
كان متنا رد بالك تبكي علينا و تزيد تكذب و تقول منا و فينا
يزي من الكذب انتي تونسهم هوما عمرك ماكنت لينا
إيناس همامي
Website Design Brisbane
Tags: