ساعات تحس روحك مخنوق بيك..
محصور في وسط بدنك...
قاعد تركب في حاجات موش متاعك..
موش طينك.. ماكش في ترابك..
موش ماك... ماكش تتنفس في هواك...
تحس روحك وردة ذابلة في وسط محبس مزيان..
كواترو كلاتو الغبرة وخرا الذبان...

تلفزة مدغدشة... شباك مكسر و الريح يهد فيه...
شقف مكسر... فلوكة شوارعها مقطعة..
دار مهجورة حيوطها خايخة... بيبانها مهلعة... روحها مقلعة..
ريحتها مندية... جرة مليانة قطران... سم هاري....
موجة مكسرة علي شطوط الزمان...
ساعات تحب تتنفس...
تلقي النفس مقطوع.. القلب مغفص بين الضلوع...
الكتف اللي باش يسندك مخلوع...
ساعات تحب تهرب من روحك تلقي ساقيك محشوشين...
و عينيك بالسواد مغدرين...
تحاول تغم علي روحك و تخبي وجهك بيديك...
ايديك رغم اللي كاملين.. تحسهم مقصوصين...
مخك عاكش من كثر التخمام...
حروفك مسمومة... و ريقك يابس...
صوتك مبحوح...
وين تحب تهرب تزيد تغرق...  علي كل شبر لقدام ترجع خطوة لتالي...
ساعات تحس روحك كي كدس العزاء...
داموس ضلام.. بير غارق.. مخزز..
زهمولة كحلة موش مفهومة...كدس رماد طافي...
ضحكة صفرة... فزاعة... شلاكة مقلوبة... بومة...
الغولة اللي يخوفو بيها الصغار...
عزوزة الستوت لمشومة لڤرومة..
بكّة... شوكة.. تخرتيلة.. بوتليس..
صفحة مقطعة من كتاب كلاه السوس...
كل حاجة خايبة تخلقت منك...
و كل حاجة حيّة تموت فيك...
ساعات تحس... تحس ! ؟؟
باش تحس؟ حاجة موش مفهومة... غريبة حتي عليك...
ساعات تحس بالغربة في وسطك... فيك... في روحك...
تحس روحك ما تعرفهاش... موش انت... تحس روحك تتخبط.. تفرفط لداخل...
ساعات...
و الساعات عندك طوال...
و اليل ما يوفاش و الظلام ما يفناش....
و انت؟
انت ضعت في وسطك و ما لقيتهاش...