كنت ديما انا الطرف الي حب العلاقة تدوم وتستمر، وميهزها هواء ،ولا كلام، ولا أهواء ..كنت ديما الطرف الي يتحمل اكثر ويحس اكثر ويحب اكثر ويواسي اكثر وزادة يتغاضى اكثر ويسامح اكثر باش العلاقة متتقصش ..
كنت نتحمل في بعدو، في تصرفاتو الباردة، وفي كذبو وفي تلوبيقو ...كنت نستناه بالسوايع باش يجيني ..

وقت يبعثلي ميساج نحس في روحي ملكت الدنيا ...وقت يضحكلي نحس في روحي في جنة ارضية ...حتى إستهلكت طاقتي وروحي وعطيتو الي منجمتش نعطيه لروحي ..وقت يضعف يلقاني انا اول واحد واقف معاه ...وقت يدبرم يلقانى اول المشجعين ووقت يبكي يلقاني نواسي فيه ...يقولي راني فادد نحاول نخرجو ونفرهدلو خاطرو ...كنت نحلم معاه ونتخاطر معاه ..وقلت ملكت الدنيا ولقيت " صديق " "عشير " " حبيب " المفردات تختلف والمعنى واحد ،هو وباش يعوضلي الحرمان ...

وفي لخر تقصت العلاقة وفي ليلة ونهار هبطط عليا المشاكل من كل ناحية ، مرضت امي ، ماتت جداي ، دوبلت وخسرة عامي ، وانا مرضت بالسرطان ، شعري بدا يطيح ، وبديت نخسر في برشة من وزني ، معادش نحمل نشوف وجهي في لمراية ،وبدات رحلتي مع الشيميو  منعرش شنوا نعمل بضبط، وليت هايمة غارسة روحي بين اربعة حيوط ، التخمام ياكل فيا ، نبكي في النهار الف مرة ومرة زايدة ..نفكر فيه خاطر بنيت عليه احلام واماني وقلت يستحيل يخليها بيا وفي لخر غدر بيا وباعني ولوحني كيف يلوحو الحاجة الي معادش تصلح ...ممكن محبنيش ومحسش معاي بشيئ لكن كان السبب في اني نتدمر ونفسيتي تتحطم ونفقد برشة قوة ، برشة كرامة ، برشة صحة ، برشة مشاعر ...


الليلة لولة مرقدتش ..لين  تعدات جمعة والنوم مكحلش عيني وين ندور نرى تصويرتو ...نرى حسو وعياطو ...معادش معدلة على حد ،دموعي يهبطو وحدهم ..وليت جهامة تمشي على الارض وفقدت برشة من وزني ...ودخلت في ديبريسون قوية ..كنت نتكسر كل يوم ...وحتى من فراشي معادش نجم نقوم  ..المخدة تتعصر بالدموع ..وانا حزينة ..كاني ناقصة شيئ والا حاجة ...
تعدا شهر على المعدل هاكا  وقلت توا يبرد ويرجع رغم هو الي خلاني وبلوكاني ...وليت نصلي وندعي اني نرجعلو ..وترجع فيا الروح ...عملت كونت اخر ووليت ندخلو للبروفيل متاعو في النهار الف مرة، نشوف تصاورو وستاتياتو وضحكاتو مع اصحابو الجدد  وانا نتقلى وحدي في بيتي ، تغتصب فيا السخانة والنموس والحكٌاكّ..حكيت مع اصحابو الجدد وصحباتو ، حكيت مع صاحبتو الي يحبها .
كل يوم نزيد ننقم على روحي لاني نرخص في روحي وقت هو باعني وانا الي نجري قي جرتو ، كيف الكلبة ، اما في قانون الحب مفماش كرامة ، مفماش رخص ، في الحب كل شيئ يتبدل ، اللون يتبدل ، الريحة تتبدل، لون سماء يتبدل ، الڨمرة تكبار اكثر وتزيان ، وانت بيدك تهز صحتك وتسمان خاطر الحب يهني ، والحب يرتح ويخف ويعطيك ثقة في روحك، ويحببك في ذاتك ويصلحلك المعوج والمشوطر والمفرعس وينظملك حياتك وتولي ترقد مرتاحة وشبعانة ، ودافية الحب يخطيك ، يعليك ولسابع سماء  بجوانحو يطير بيك ،

تعداو شهرين وبعدهم  تلاثة ،لين لهتني الدنيا وتلهيت بقرايتي ، بمرضتي ،اما مزالت ندخل نشوفو شنوا جديدو ، نسنس عليه حتى لين تعدى عام و  ثنين ..و الدنيا هزيتني لبعيد ..ونسيتو ..حتى الموتْ باسْ" متاع الكونت الي كنت ندخل باش نشوفو تفسخْ ونسيتوْ والا انا تناسيتو ومحيتو ..

وفهمت الي الحب موش في نهار واثنين ، موش تحبني من منظهري المغري وربما من زين وجهي ، والا تحبني من ستاتياتي على الفيسبوك ، والا ريتني نشري في بعض المشتريات وانت تعمل في كابوسان ناقصة سكر ، حبني وانا حالتي كيف البومة كي نصبح الصباح ، حبني وانا نبكي ، حبني وانا حزينة ، وحبني وانا فرحانة غشيرة صغيرة، حبني وانا في اتعس حالاتي ، حبني وعلم الحبْ.
ليك إنت خاص ...

موش كيف الي يسمعك ..كيف الي يحس بيك في سكاتك ...موش كيف الي يشدك من يدك بعد ما تكمل الثنية ..كيف الي يبداها معاك من اولها ..موش كيف الي يعطي من قلبو من غير حساب ..كيف الي يعملك كراسة كريدي ويقيد عليك ...وموش الي يفهمك من غزرة عينيك ...كيف الي يستناك باش تحكي ..موش كيف الي يحلك في البحر ثنية ..كيف الي يحبطك ويفشلك ...موش كيف الي ينفخ على جرحك باش يبرد ...كيف اللي يشعل فيك الف وقيدة حية ..موش كيف الي في عز البرد يغطيك ...كيف الي ما على بالو بيك ...موش كيف اللي يطلعك لسابع سماء ..كيف الي في لحظة يهبطك لسابع ارض ..موش الي يفرشلك طريقك ورد...كيف الي يفرشهولك شوك ...وموش كيف يحارب الدنيا على خاطرك...كيف الي من اول غصرة يمشي ويخليك ...




وتعدات الفصول ورجعت السبول للحقول وضوات عليا الڨمرة والنجوم ...ونسيت وقلبي برد وثنيت ركبتي ورزنت وليت اقسى من برد الصرد ، ابرد من حجر السكةْ ..

وليت نصلي لروحي ..وتلهيت بقرايتي وتحقيق احلامي وطورت روحي ...

و كان انتصار مني ...
انتصار اني تغلبت على خوفي وعلى حبي ليه  ...وكان انتصار حزين حزين جدا، لاني باللحق حبيتو وبقدرة ربي نسيتو ومن بالي نزعتو ومحيتو  ...

القوة موش في حبي ليه ..القوة اني تجاوزت حبو وملامحو وصوتو معادوش يصونو في وذني ...
وفي لحظة ما تغير كل شي الدنيا ولات مڨردة عليا ..وتجاوت الحكاية ووليت قررت باش نتخلى على كل حاجة جايبتلي القلق، ونخزر قدامي ونعيش لروحي ونطوّرها ونعمل كان الحاجات اللي نحبهم ونمن بيهم. وندور نفسي كان بالناس اللي تخزر لنفس الإتجاه متاعي وعندها نفس إنفتاحي وأفكاري و رؤيتي واللي باش تدزّني القدّام وما تحكمش عليّا وتعاونني حتّى بتبسيمة والا كلمة باهية وانحي التفش والزايد واللي ما يصلحش من ثنيّتي. باش نسكّر البيبان قدّام كلّ علاقة توكسيك، وكلّ إنسان جاي ياخذ مني وما يعطيني شي ، وكل حاجة تقلقلي راحة بالي. سلامي الداخلي هو أهم حاجة وهو الهدف الأقصى.

باش نكون انا كيما نحبّ نكون، وسأبقى حيث الرّقص
والغناء لأنّ الأشرار لا يرقصون ولا يغنون».


حسام حفيظ