Notice: Undefined variable: relatedArticlesCount in /home1/datalyz/public_html/tounsia/plugins/content/tags.php on line 149
انت شويا مني
Ghada Tawes - غادة طاوسانت غزرتي كي نراك و ندور
انت قرايت التسعة شهور
انت رفيسة السحور
انت أنا كي نبدا قاعدة و ندور ندور
انت فرحة الثمنطاش و غبينة الأربعين
انت عشره سنين عرس باردين
انت تلاثة حكايات حب منسيين
و حارة مكفنة تحت السرير
و ميترو قماش حرير
انت ورقة بو خمسين
انت دينار يطلع بياسة بو ألفين
انت كحل و تحويقة العينين
انت حمير عالشفة بنين
انت عمر و لا ثنين
انت فريب نهار السبت و بالة جديدة
انت كلمت شرفت و لازمك تبديلة جديدة
انت برشا من شويا رجال
انت الصعب و الدلال
انت تصويرة جنب الشلال
انت المفتي كي يشوف الهلال
انت السروال كي يطلع و الكلاسط تبان
انت أنا كي مانلقاش الكلام
انت بلاد الحرام و الحلال
انت المفتاح كي يطيحلي في الظلام
انت بريوشة الصباح بلا قهوة
انت نزوة
و ستة غرزات في الحاجب مالصغرة
و الضحكة بعد النغرة
انت دخان السيڨارو كي يطير في الهوا
انت دبوزة كنا نحسايبوها دوا
انت برشا متخبيين فيك
انت برشا عباد تلوج عليك
انت غزرة عينيك
و برشا كلام مش ليك
انت كسكسي نهار الأحد
و الأحمر اللي عالخد
انت نقشة تنبت الحبوب في اليد
انت دار ماساكن فيها حد
انت نسمة الصيف كي تضرب في الشهيلي
انت صلعة مقداد السهيلي
انت هيمتني تيمتني كي تبدا تغنيلي
انت بوستخالة في الدڨنونة
و أخبار الثمنية المحنونة
و عينين مسكرة و محلولة
انت أول دوش بعد القصة
انت شعر مشبشب من غير قصة
انت البعثة و العسة
انت شويا مني و برشا مالناس
انت ڨمرة أربعطاش
انت تمثيل بلاش احساس
انت خوذ راحتك .. و ماتبطاش
انت شويا مني و برشا مالناس ...
انت شكبة منظمة مع سيترون بارد
و كلام اتمتمو كي تبدا شارد
انت ساكت .. كيفي ساكت ...
غادة طاوس
Website Design Brisbane
Tags: