Notice: Undefined variable: relatedArticlesCount in /home1/datalyz/public_html/tounsia/plugins/content/tags.php on line 149
اليوم عرسنا..
Ghofrane Ben Issa - غفران بن عيسى اليوم عرسنا..
اليوم تبدا فرحتنا اليوم باش يهزني لدويرتنا
دويرة على قدها اثاثها محبتنا و زينتها في عشرتنا
من غير لا عرس و لا خطبة وحدنا قرينا فاتحتنا
لا مشيت للحجامة و لا عملت تصديرة هياا يا دوبك تصويرة
هزينا عمك نعيم و مشينا لرضاا قلنالو نحبو تصويرة ف المنصةة و ادعولنا بالهناا
و تعدينا لل ليسي هزينا دبوزة قازوز و مشينا بنكنا نستنو ف الناس الي كانت كي تشوفنا غادي تعاركنا !
باش نقولولهم هااي يا جماعةة يزي ليوم رانا عرسنا و ليلةة دخلتنا
لا مشيت للحمام و لا جبدت شعري ولا في مخي الروبة البيضةة
و لا نت لبست الكوستيم
جيتك كيما تعرفني ليك سنين
بالشعر لمشبشب و تحويقت العينين
جيتك كيف عادتي ندحنس و نتكعبر نحب في شونك نكبر
لا بكيت على امي ولا غاضني فراق خواتي
حطيتك بين عينايا نت بويا و نت حياتي
مهرنا محبتنا و شرابنا و حلونا هيا عشرتنا
و مشينا لدويرتنا
غادي وين الخنار وين انا باش نولي الام و نت بو الصغاار
و يضحك علينا عمك سالم العطار
و ناس تحكي بينا و تقول محلاه الحب جهار نهار
و نسهرو ليالينا و قعدتنا منصوبة قدام الدار
قهوتنا فايحةة بزين حكايتنا
و دارنا مليانةة نوار
و نسهرو ناكلو ف القلوب و الكاكاوية
و تحكيلي نت على غرامك بياا
و تصب علينا مطرة الشاا و انا متخبيةة في شونك نتفرج ف السماا
و تهزني و تهرب بياا لبعيد
و نجريو كي الغشاشر و ايدي من ايديك ما تسيب
و عينيك عليا ما تغيب
و نجيبو كدس صغار
المغشاش و الخرنان و الحزار
و نكتبو باسمهم الدار
و نربوهم على الحب و نفهموهم الي هو مش حرام
و نكبرو و نشيبو و نرابيو الصغار و نعلمو قيمة المحبة للكبار
و حبنا يعلى صوتو
و نكتبو على قبرنا رانا عشناا حبنا قبل ما نموتو...
غفران بن عيسى
Website Design Brisbane
Tags: