Notice: Undefined variable: relatedArticlesCount in /home1/datalyz/public_html/tounsia/plugins/content/tags.php on line 149
أمــــي
Ghofrane Ben Issa - غفران بن عيسى أمــي ...
كيما عمري لا عرفت نحكي عليها
و لا نوصفها بحرف
أمــي
كيما عمري لا باش نجم نوصف حبي ليها
كيما عمري لا بدلت خزرتي ليها
كيما عمري لا قدرت نملى روحي بيها
ديما محتاجة ليهاا
أمـــي
أمي المرى القوية .. المڨدية .. كيف الڨمرة في سمانا مضوية
فوق سابع سماء معلية
أمـــي
امي مرى قوية
ما نعرفش منين تجيب القوة هذيا
مرى جبارة
يا جبل ما يهزك ريح
لا تتعب و لا طيح
مرى من صوان
ماتقدر عليها يا زمان
لا نهار رضت لروحها تتهان
أمي مرى عمرها ما تبكي قدامنا
اما نعرف انها تبكي برشا
مرى بكاية .. لكن تعرف وقتاش تبكي
عمري لا ريت امي قدامنا تبكي
و لا من دلالنا تشكي
ديما لاباس .. ديما الحمدلله
شي ما فما ..
امي كيما كل مرى اما عمرها لا كانت كيفهم
عمرها لا ضعفت كيفهم
و خلاتنا نراوها ضعيفة
امي تبكي علينا برشا
كي تخاف علينا تبكي
و كي نتعبوها تبكي
و كي ما نسمعوش الكلام تبكي
اما عمرنا لا ريناها تبكي
مش قلتلكم امي مرى قوية
قداش يامي باش نحكي عليك و انا عمري ما نجمت نوصف حبي ليك
عمري ما عرفت نعبر على روحي الي معلقة فيك
حروف الدنيا ما تكفيك
و لتوا ما عرفت نحكي عليك ...
كلمات غفران بن عيسى / رسمة نوران بن يدر
Website Design Brisbane
Tags: